Zebur 79 - Мукаддес Китап

79-нҗы мезмур

¹ Айдымчылар топарының ёлбашчысына. «Әхт лилиясы» әхеңинде айдылян. Асафың мезмуры.

² Эй, Ысрайыл Чопаны, Эй, Юсуба сүрә дей ёл Гөркезйән, гулак гой! Эй, керупларың үстүнде Отуран, нур сач!

³ Эфрайымың, Беняминиң, Манашаң өңүнде; гүйҗүңи ояр, гел-де халас эт.

⁴ Эй, Худай, Сен бизи дикелт, йүзүң нур сачсын, халас болалы.

⁵ Я Хөкмүрован Худайымыз Реб! Өз халкың дога-дилеглерине Сен хачана дек болҗак гахарлы?

⁶ Сен олара гөзяшлы чөрек ийдирдиң, гөзяшларыны сув кимин ичирдиң.

⁷ Гоңшы халклар биз бабатда җедел эдйәрлер, душманларымыз үстүмизден гүлйәрлер.

⁸ Бизи дикелт, эй, Хөкмүрован Худай! Йүзүң нур сачсын, халас болалы.

⁹ Үзүм нахалыны Сен Мүсүрден гетирдиң, миллетлери ковуп, оны отуртдың.

¹⁰ Сен онуң үчин тайярладың топрагы, ол көк уруп, долдурды юрды.

¹¹ Даглар бүренди онуң саясына, әпет кедр дарагты – шахаларына.

¹² Ол деңзе ченли узатды шахаларыны, деря ченли – өз пудакларыны.

¹³ Эмма хер өтегчиниң онуң мивесини ёлуп билери ялы, Сен онуң хаятларыны нәме үчин вейран эйледиң?

¹⁴ Токай екегапаны оны дагадяр, мейдан җандарлары оны гемирйәр.

¹⁵ Долан, эй, Хөкмүрован Худай! Гөклерден сал Сен назары, гөр бу үзүм багыны –

¹⁶ элиң отурдан бу нахалыны, Өзүң үчин кувватландыран ынсан оглуңы.

¹⁷ Олар оны отда якдылар, оны чапдылар. Гой, олар Сениң газаплы бакышыңдан йитип гитсинлер.

¹⁸ Эмма көмек эт сагыңдакы ынсана Сен оны Өзүң үчин гетиренсиң кемала

¹⁹ Шонда йүз өвүрмерис Сенден хич хачан; бизе яшайыш бер, чагырарыс Сениң адыңы.

²⁰ Бизи дикелт, я Хөкмүрован Худайымыз Реб! Йүзүң нур сачсын, халас болалы.