Zebur 78 - Мукаддес Китап

78‑нҗи мезмур

Асафың мезмуры

¹ Эй, Худай, кесеки миллетлер Сениң сайлан топрагыңа аралашдылар, мукаддес ыбадатханаңы харамладылар, Иерусалими вейран этдилер.

² Сениң бенделериңиң җесетлерини бердилер гөк гушларына, Сениң садыкларыңың этини – ериң вагшы хайванларына.

³ Иерусалимиң даш-төверегине сув кимин оларың ганларыны дөкдүлер, олары җайлан болмады.

⁴ Гоңшуларымыза болдук биз гүлки, төверегимиздәкилере – рысва, ойнатгы.

⁵ Я Реб, хачана ченли гахарланҗак? Бизе мүдимилик гахарланҗакмы? Габанҗаңлыгың от дей ловлап янҗакмы?

⁶ Сен Өз газабыңы дөк Сени танамаян миллетлериң үстүне, адыңы чагырмаян шалыкларың үстүне.

⁷ Чүнки олар ювутдылар Якуп халкыны, вес-вейран этдилер онуң юрдуны.

⁸ Аталарымызың гүнәлерини бизе йүклеме, бизи гаршыламага ховлуксын Сениң рехимиң, чүнки җуда тапдан дүшендирис биз.

⁹ Эй, Худай, Халасгәримиз! Өз шанлы адыңың хатырасына, Сен ярдам эйле, Өз адыңың хатырасына, бизи халас эт, гүнәден сапла.

¹⁰ «Оларың Худайы ниреде?» дийип, гой, миллетлер айтмасын. Сениң бенделериң дөкүлен ганларының алынянлыгы гөз алнымызда, гой, миллетлер билсин.

¹¹ Хузурыңа туссагларың наласы етсин; өлүме хөкүм эдиленлери гора Сен Өз бейик гүйҗүңе гөрә.

¹² Я Таңры, гоңшуларымызың Сени яңсылан яңсыларыны еди эссе эдип оларың башындан индер.

¹³ Онсоң биз – Сениң халкың, өриң сүрүси, шүкүр эдерис Саңа эбеди, шөхратыңы беян эдерис несиллербойы.