Zebur 77 - Мукаддес Китап

77‑нҗи мезмур

Асафың маскили

¹ Эй, халкым, таглыматыма дыкгат бер, мениң сөзлериме гулак гой.

² Мен сизе тымсал айдып берейин, гадымыетиң сырларыны беян эдейин.

³ Эшиден ве билен затларымызы, аталарымызың бизе айданларыны.

⁴ Олары зүрятларындан гизлемерис биз; Реббиң шанлы ишлерини, гүйч-кувватыны, Онуң гөркезен гудратларыны, гелҗек несле ыглан эдерис.

^5-8 Гелҗек неслиң, инди догулҗакларың билери ялы, оларың хем өз нобатында чагаларына айдары ялы, умытларыны Худая баглары ялы, Худайың эденлерини унутман, Онуң парзларыны саклары ялы, йүреклери Худая вепа бермедик, рухы Оңа садык болмадык аталары дей дикдүшди, питнечи болмазы ялы, Ол Якубың неслине – Ысрайыл халкына кануны берди. Перзентлерине оны өвретмеклиги ата-бабаларымыза Ол эмр этди.

⁹ Ок-яй билен ярагланан Эфрайым несли, сөвеш гүнүнде өкҗе гөтерди.

¹⁰ Олар Худайың әхтини сакламадылар, Онуң канунына гөрә йөремекден йүз дөндүрдилер.

¹¹ Унутдылар Онуң ишлерини, олара гөркезен гудратларыны.

¹² Ол Мүсүр юрдунда, Зоган дүзүнде, аталарының өңүнде гудратлы ишлери этди.

¹³ Ол деңзи бөлди, олары ондан гечирди, сувлары бир үйшмек кимин дурузды.

¹⁴ Гүндизине ёл гөркезди Ол булут билен, бүтин гиҗе – одуң ягтысы билен.

¹⁵ Ол чөлде гаяны ярды, чуңлуклардан дей олары болелин сувдан гандырды.

¹⁶ Ол гаядан сувлар чогдурды, сувлары дерялар кимин акдырды.

¹⁷ Йөне шонда-да Оңа гаршы гүнә этмеги, чөлде Бейик Худай гаршы баш гөтермеги, довам этдилер.

¹⁸ Йүреклеринде Худайы сынага салып, өз күйсән иймитлерини талап этдилер.

¹⁹ Худая гаршы сөзләп, шейле дийдилер: «Худай чөлде сачак язып билерми?

²⁰ Хава, Ол гаяны ярып, сувлар чогдурды, акарлары долуп-дашдырды, эмма Өз халкына чөрек берип билерми? Оны эт билен үпҗүн эдип билерми?»

²¹ Реб муны эшиденде дергазап болды, Якуп халкына гаршы ялын туташды, Ысрайыл халкына газабы өр боюна галды.

²² Себәби олар Худая иман этмеди, Онуң халас эдиш гүйҗүне бил багламады.

²³ Муңа гарамаздан, Ол асмана буюрды, гөклериң гапыларыны ачып гойберди.

²⁴ Олар иер ялы үстлерине манна ягдырды, олара гөклериң галласыны иберди.

²⁵ Адам огуллары перишделериң чөрегини ийди, Ол олара болелин иймит иберди.

²⁶ Гөклерде гүндогар елини Ол өвүсдирди, кувваты билен гүнорта елини Ол гөнүкдирди.

²⁷ Эт ягдырды үстлерине бир тозан кимин, ганатлы гушлары – деңиз чәгеси кимин.

²⁸ Булары гачырды чадырларының араларына, месгенлериниң даш-төверегине.

²⁹ Олар герк-гәбе ийип дойдулар, себәби Ол оларың күйсән задыны берди.

³⁰ Эмма хениз ислеглеринден эл гөтермәнкә, иймитлери хениз агызларындака,

³¹ Худайың газабы оларың үстүнден инди. Ол оларың иң даявларыны өлдүрди, Ысрайылың новҗуванларыны ере гаплады.

³² Эмма шонда-да гүнәлерини довам этдилер, Онуң гудратларына ынанмадылар.

³³ Шоңа гөрә, оларың гүнлерини пуҗа чыкарды, йылларыны ховп-хатара гаплады.

³⁴ Олары өлдүрен махалы Оны агтарярдылар, тоба эдип, эрҗеллик билен Оны гөзлейәрдилер.

³⁵ Олар Худайың өзлериниң гаясыдыгыны Бейик Худайың өзлериниң Пенакәридигини ятлаярдылар.

³⁶ Олар агызлары билен Оңа яранярдылар, эмма диллери билен ялан сөзлейәрдилер.

³⁷ Йүреклери болса Оңа садык дәлдилер, олар Онуң әхтине бивепадылар.

³⁸ Йөне рехим-шепагат эдип, оларың гүнәсини Ол багышлады, олары хеләк этмеди, гахарыны көп гезек олардан совды, бүтин газабыны ояндырмады.

³⁹ Онуң ядындады оларың бир ынсандыгы, гечип гидйән ве доланмаян бир шемалдыгы.

⁴⁰ Нәче гезек чөлде Оңа гаршы баш галдырдылар, сәхрада Оны гамландырдылар!

⁴¹ Худайы өвран-өвран сынап гөрдүлер, Ысрайылың Мукаддесини өҗүкдирдилер.

⁴² Ятламадылар Онуң гүйҗүни, олары душмандан азат эден гүнүни.

⁴³ Мүсүрде гөркезен аламатларыны, Зоган дүзүндәки гудратларыны:

⁴⁴ олар деряларындан ичмесин дийип, Ол акарларыны гана өвүрди.

⁴⁵ Олары ялмап-ювутсын дийип, үстлерине сиңек сүрүсини иберди. Олары башагай этсинлер дийип, гурбагалар иберди.

⁴⁶ Гемриҗи чекиртгә берди хасылларыны, юмуртгадан чыкан чекиртгә – зәхмет рәхнетлерини.

⁴⁷ Долы билен вейран этди үзүмлерини, чабга билен – инҗир агачларыны.

⁴⁸ Дола берди мал-гараларыны, йылдырымлара – сүрүлерини.

⁴⁹ Оларың үстлерине иберди, Өз гахарының ховруны, газабы, дергазабы хем-де беланы – гырян перишделериң бир топарыны.

⁵⁰ Ол ёл берди Өз газабына: өлүмден горамады олаң җаныны, мергә берди өмүрлерини.

⁵¹ Мүсүрде хеләкледи әхли новбахарлары – Хамың чадырларындакы илкинҗи зүрятлары.

⁵² Өз халкыны болса гоюнлар кимин ёла рована этди, чөлде олары бир сүри кимин Ол угрукдырды.

⁵³ Олары ховп-хатардан горап әкитди, эйменмедилер, душманларыны болса деңиз ювутды.

⁵⁴ Гетирди олары Өз мукаддес юрдуна – элиниң еңип алан дагына.

⁵⁵ Миллетлери оларың өңүнден ковды, чадырларында Ысрайыл тирелерини орнатды, мүлклерини пайлап, олара мирас хөкмүнде берди.

⁵⁶ Олар болса хениз-де Бейик Худайы сынаярдылар, Оңа гаршы баш галдырярдылар, парзларыны берҗай этмейәрдилер.

⁵⁷ Дәнип, аталары дек бивепадылар, әхтибарсыз кеман кимин ынамсыздылар.

⁵⁸ Оны өҗүкдирйәрдилер сеждегәхлери билен, габанҗаңлыгыны оярярдылар бутлары билен.

⁵⁹ Худай эшидип, газаба мүнди, Ысрайылы бүс-бүтинлей рет этди.

⁶⁰ Ынсанлар арасындакы месгени болан Шилодакы чадырыны терк этди,

⁶¹ Есирлиге берди Әхт сандыгыны, душманларың элине – Өз шөхратыны.

⁶² Өз халкыны гылыҗа берди, Өз сайлан халкына дергазап болды.

⁶³ Йигитлерини от ялмап ювутды, гызларына той айдымлары айдылман галды.

⁶⁴ Руханылары гылычдан өлди, оларың дул хатынлары яс тутуп билмеди.

⁶⁵ Шонда Таңры галкды укудан оянан кимин, шерапдан айңалмадык бир эркек кимин.

⁶⁶ Ол душманларына өкҗе гөтертди, олары бакы рысвалыга сезевар этди.

⁶⁷ Ол Юсубың чадырыны рет этди, Эфрайымың тиресини сайламады-да,

⁶⁸ сайлап алды Яхуда тиресини – Өзүниң сөен Сион дагыны.

⁶⁹ Мукаддес өйүни Ол бина этди, белент гөклер дей, эбедилик беркарар эден дүнйәси кимин.

⁷⁰ Өз бендеси Давуды сайлап, оны гоюн агылындан Ол алды.

⁷¹ Оны сайлап-сечен миллети Ысрайыла – Өз халкы болан Якуп неслине чопанчылык этмеклик үчин, гузулы гоюнларың ызындан Ол алып галды.

⁷² Давут пәк йүрек билен олары бакды, олары өкде эллери билен ол угрукдырды.