Zebur 76 - Мукаддес Китап

76-нҗы мезмур

¹ Айдымчылар топарының ёлбашчысына. Едутуның мукамына лайыклыкда. Асафың мезмуры.

² Мен Худая перят эдйәрин, мени эшидери ялы перят эдйәрин.

³ Мушакгатлы гүнүмде Таңрыны агтарярын, голларымы гиҗесине дынувсыз гөге герйәрин, мениң җаным теселлини кабул этмейәр.

⁴ Худайы ятлап, ахы-нала чекйәрин, Ол хакда оя батярын, рухум ысгындан дүшйәр. Села

⁵ Сен мениң гөзлерими укудан гойдуң, ынҗалыкдан гачып, гүрләп билмейәрин.

⁶ Гадымы гүнлер, көне дөвүр барада оя батярын.

⁷ Ятлаярын, гиҗесине өз йүрегим билен сөхбет эдйәрин ойланярын, рухум ичгин-ичгин чинтгейәр:

⁸ Эйсем Таңры эбедилик рет эдәйдими? Инди менден асла разы болмазмы?

⁹ Эйсем сөйгүси эбедилик кесиләйдими? Берен сөзлерини хич хачан берҗай этмезми?

¹⁰ Худай мерхемет этмеги унудайдымы? Гахарында рехим-шепагатыны бес эдәйдими? Села

¹¹ Дийдим: «Бейик Худай инди тарапымызы тутмаяр – бу мени лапыкеч эдйәр».

¹² Мен Реббиң эденлерини яда саларын, Сениң гадымы гудратларыңы ятлап гечерин.

¹³ Әхли ишлериң барада пикир эдерин, Сениң бейик ишлериң барада оя батарын.

¹⁴ Сениң ёлуң мукаддесдир, эй, Худай, Худайымыз ялы бейик хайсы худай бар?

¹⁵ Сен гудратлары эдйән Худайсың, Сен халклар арасында гүйҗүңи аян эденсиң.

¹⁶ Сен кувватлы голуң билен Өз халкыңы: Якубың, Юсубың несиллерини азат эйледиң. Села

¹⁷ Эй, Худай, сувлар Сени гөрдүлер, Сени гөренлеринде хедер этдилер, дүйпсүз чуңлуклар галпылдадылар.

¹⁸ Булутлар ягмыр дөкдүлер, гөклер гүбүрдедилер, пейкамларың чар тарапа учдулар.

¹⁹ Харасат ичинде гүррүлдиңиң сеси яңланды, йылдырымларың дүнйәни ягтыландырды, ер титрәп, лерзана гелди.

²⁰ Сениң ёлуң деңиз ичреди, Сениң ёдаң хайбатлы сувлар ичреди, эмма аяк ызларың гөрүнмейәрди.

²¹ Сен халкыңа Мусаны, Харуны чопан белледиң, олара гоюн сүрүсине дек Сен ёл гөркездиң.