Zebur 73 - Мукаддес Китап

73‑нҗи мезмур

Асафың маскили

¹ Эй, Худай, нәме үчин бизи хемишелик ташладың? Нәме үчин өриңдәки гоюнлара ловлаяр Сениң газабың?

² Ятла Сен гадымдан Өзүң үчин сайлан халкыңы – Өзүңе тайпа эдинмек үчин азат эденлериңи, ятла Сен месген тутунан Сион дагыңы.

³ Мүдими харабалыклара ховлук-да, сал Сен назары – душман вейран этди мукаддес өйүңдәки әхли затлары.

⁴ Ыбадат өйүнде душманларың арлап гыгырды, олар нышанларыны шол ерде дикди.

⁵ Олар гөйә гүр агачлыга палталары айлап салян кишиниң кешбиндедилер.

⁶ Инди болса әхли хашамларыны бир пурсадың ичинде палта, чекич билен парчаладылар.

⁷ Мукаддес өйүңи ода якдылар, Сениң месгениңи харамладылар, оны ер билен егсан этдилер.

⁸ Өз-өзлерине шейле дийдилер: «Оларың барыны табын эделиң». Худайың юрдундакы әхли ыбадат өйлерини ода бердилер.

⁹ Биз гөрмейәрис гудратлы аламатлары, инди хич бир пыгамбер хем ёк; хачана ченли шейле болҗагыны билйән арамызда ёк.

¹⁰ Эй, Худай, душман хачана ченли яңсыламалы? Душман Сениң адыңа эбедилик дил етирсинми?

¹¹ Нәме үчин голуңы ыза чекйәрсиң? Элиңи голтугыңдан чыкарып, ёк эт олары!

¹² Эй, Худай, эзелден бәри Сен Патышамсың, ер йүзүнде халас эдиш ишлерини берҗай эдйәрсиң.

¹³ Гудратың билен Сен деңзи бөлдүң, деңиз аждархаларының башларыны сувларда дөвдүң.

¹⁴ Ливятаның башларыны күл-оврам эдип, оны чөл вагшыларына шам эдип бердиң.

¹⁵ Гөзбашлар ярдырып, булаклары акдырдың, хайбатлы дерялары гус-гуры этдиң.

¹⁶ Гүндиз Сениңки, гиҗе Сениңки, Сен гөгүң ышыкларыны, Гүни беркарар этдиң.

¹⁷ Ериң әхли чәклерини Сен чекдиң, Сен томсы, гышы яратдың.

¹⁸ Я Реб, ятла душманың яңсылайшыны, акмак халкың Сениң адыңы хар эдишини.

¹⁹ Вагшы хайванлара берме Өз гумрың җаныны, эбедилик унутма пукараларың яшайшыны.

²⁰ Өз әхтиңи ятла, чүнки юрдуң әхли букы ерлери зулум өйлеринден яңа дос-долы.

²¹ Эзиленлер рысва болмасын, пукаралар, мәтәчлер адыңы шөхратландырсын.

²² Эй, Худай, галк-да, даваң үчин давалаш, акмагың гүнузын Сени яңсылайшыны ятла.

²³ Өз душманларыңың сеслерини унутма; Саңа гаршы баш галдырянларың гохы дынгысыз артяр.