Zebur 72 - Мукаддес Китап

ҮЧҮНҖИ КИТАП (72 – 88‑нҗи мезмурлар) 72‑нҗи мезмур

Асафың мезмуры

¹ Догрудан-да, Худай Ысрайыла йүреги пәк боланлара ягшыдыр.

² Йөне тас бүдрәпди мениң аякларым, тас тайыпды мениң гадамларым.

³ Чүнки текепбирлере гөриплик этдим: олар эрбетлик эдйән-де болса, абадан дурмушларының бардыгыны гөрдүм.

⁴ Чүнки олар җебир чекмейәне меңзейәр, оларың сагдын, семиз беденлери бар.

⁵ Олар бейлекилер ялы азап чекмейәр, бейлекилер ялы кынчылыга дучар болмаяр.

⁶ Шоңа гөрә текепбирликлери боюнларыны монҗук кимин безейәр, зулум олары эгинбаш кимин бүрейәр.

⁷ Ягдан яңа габаряр оларың гөзи, гөвүн хыялларындан долуп-дашяр йүреги.

⁸ Олар яңсылаяр, бетпәл гүрлейәр, гопбамсырап, зулум билен горкузяр.

⁹ Оларың агызлары гөклере хүҗүм эйлейәр, диллери болса ерде бош затлары яңраяр.

¹⁰ Шонуң үчин Худай халкы шолара тарап өврүлйәр, оларың гепине гулак габардяр.

¹¹ Текепбирлер диййәр: «Худай биләермикә? Бейик Худай мундан хабарлымыка?»

¹² Ине, текепбирлер шейле гүрлейәр; олар элмыдама гайгысыз-гамсыз, өз байлыгыны артдыряндырлар.

¹³ Мен бидерек ере калбымы пәк саклапдырын, гүнә этмекден сакланыпдырын.

¹⁴ Чүнки узаклы гүн кынчылыга сезевар болдум, хер сәхерде мен эҗир чекдим.

¹⁵ «Мен хем шолар ялы гүрлеҗек» диен болсадым, онда Худайың халкының өңүнде дөнүк болардым.

^16-17 Муңа акыл етирҗек болуп пикире батдым, эмма тә Худайың мукаддес өйүне гирйәнчәм, бу маңа җуда кын болуп гөрүнди. Шондан соң эрбетлериң соңуна дүшүнип галдым.

¹⁸ Догрудан-да, Сен сүрчек ерлерде гойдуң олары, харабалыга дүшер ялы этдиң олары.

¹⁹ Олар бир салымда вес-вейран болды, вехимден яңа ёк болуп гитди!

²⁰ Эй, Таңры Сен пейда болан вагтыңда, дүйш гөрүп оянылан пурсатдакы дей, пуҗа чыкарарсың хыялларыны.

²¹ Калбым хасратдан яңа долуп-дашанда, йүрегим санҗым-санҗым боланда,

²² надан болуп, дүшүнмәндирин, хайван кимин болупдырын Сениң өңүңде.

²³ Йөне шонда-да мыдама Сениң билендирин, Сен тутярсың мени голумдан.

²⁴ Несихатларың билен маңа ёл гөркезйәрсиң, соңунда мени хормат билен кабул эдерсиң.

²⁵ Мениң гөклерде Сенден башга кимим бар? Сениң билен ерде-гөкде ёк мәтәчлигим.

²⁶ Теним, йүрегим ысгындан дүшйәр, йөне Худай йүрек кувватым, бакы несибәм.

²⁷ Догрудан-да, Сенден узаклашянлар ёк болуп гидер, Өзүңе бивепалык эденлери Сен ёк эдерсиң.

²⁸ Мениң үчин болса Худая якынлашмак ягшыдыр. Мен Хөкмүрован Ребби өзүме пена эдиндим; мен Онуң әхли эден ишлерини ыглан эдерин.