Zebur 65 - Мукаддес Китап

65‑нҗи мезмур

Айдымчылар топарының ёлбашчысына. Нагма. Мезмур.

¹ Эй, тутуш ер йүзүндәки ынсанлар! Худая хешелле какың.

² Онуң шөхратлы адына нагмалар айдың, Оңа аҗайып алкышлар айдың.

³ Худая дийиң: «Эй, Худай, ишлериң ненең хайбатлы! Кувватыңың бейиклигинден яңа душманларың Саңа боюн болярлар.

⁴ Саңа сежде эдйәр бүтин ер йүзи; олар Саңа нагма айдярлар, Сениң адыңа нагма айдярлар». Села

⁵ Гелип гөрүң Худайың эденлерини: Ол ынсанлар арасында эдйән ишлеринде хайбатлы.

⁶ Ол деңзи гуры ере өвүрди; олар дерядан пыяда гечди; Онуң шол ерде эденлерине шатландык.

⁷ Ол кувваты аркалы хөкүм сүрйәр эбеди, миллетлере гараяр Онуң гөзлери; гой, питнечилер баш галдырмасын. Села

⁸ Эй, халклар, Худайымыза алкышлар айдың; Оңа айдян алкышларыңыз яңлансын.

⁹ Ол бизи аман галдырды, аягымызы бүдремекден саклады.

¹⁰ Эй, Худай, Сен бизи сынап барладың, күмшүң арассаланышы дек бизи сапладың.

¹¹ Сен бизи дузага салдың, аркамыза мушакгатлар йүкледиң.

¹² Башымызы ынсанларың аяк астына салдың; биз отдан гечдик, сувлардан гечдик, ахырсоңы гиң ере бизи чыкардың.

¹³ Мен якма гурбанлыклар билен өйүңе барып, Саңа эден касамларымы берҗай эдерин.

¹⁴ Кынчылыга дучар боламда, бу вадалары дилим сөзләп, агзым касам эдипди.

¹⁵ Саңа гурбанлык гочларың түссеси билен семиз маллардан якма гурбанлыклары хөдүр эдерин; өкүзлери, гочлары Саңа гурбан эдерин. Села

¹⁶ Эй, Худайдан горкянлар, гелиң-де, диңләң! Онуң мениң үчин эденлерини айдып берейин.

¹⁷ Мен Оңа дат-перят этдим, дилим билен Оны бейгелтдим.

¹⁸ Эгер йүрегимде гүнә болсады, онда Таңры маңа гулак гоймазды.

¹⁹ Эмма Худай мени эшитди, догамың сөзлерине Ол дыкгат берди.

²⁰ Гой, Худая алкыш айдылсын, чүнки мениң догамы Ол рет этмеди, менден садык сөйгүсини Ол гайгырмады.