Zebur 55 - Мукаддес Китап

55‑нҗи мезмур

¹ Айдымчылар топарының ёлбашчысына. «Узакдакы дуб агаҗының үстүнде отуран кепдери» мукамының әхеңинде чалынян. Гат шәхеринде пилиштлилер Давуды тутанларында, онуң айдан миктамы.

² Эй, Худай, маңа мерхемет эйле, чүнки адамлар мени депгилейәрлер; душманлар узаклы гүн маңа сүтем эдйәрлер.

³ Душманларым узаклы гүн мени депгилейәрлер, чүнки мениң билен урушянлар көп, эй, Бейик Худай!

⁴ Мен горка дүшенимде Саңа бил баглаяндырын.

⁵ Худайы Онуң вадасы үчин шөхратландырярын, Оңа бил баглап, горкмаярын мен; ынсан маңа нәме эдип билсин?

⁶ Олар узаклы гүн ёйяр мениң сөзлерми, маңа зыян этмәге гөнүкдирилен бар ниетлери.

⁷ Олар дил дүвүшйәр хем-де гизленйәр, җанымы алмак үчин мени аңтаяр.

⁸ Эйсем олар гүнә этсе-де, гачып гутулармыка? Эй, Худай, газабыңда боюн эгдир халклары!

⁹ Сергездан гезен гүнлерим Сенде саналгы, мениң гөзяшларым Сенде язылгы; олар Сениң китабыңда язылгы дәлми?

¹⁰ Сени чагыранымда душманларым ызына дөнйәр; билйәрин: Худай тарапдарымдыр.

¹¹ Худая – вадасы үчин шөхратландырярын, Реббе – вадасы үчин шөхратландырярын,

¹² Худая бил баглаян, горкмаярын мен; ынсан маңа нәме эдип билсин?

¹³ Эй, Худай, Саңа берен касамларымы берҗай эдерин, Саңа шүкүр гурбанлыкларыны хөдүр эдерин.

¹⁴ Чүнки Сен җанымы өлүмден халас эйледиң; яшайыш нурунда Худай өңүнде гезерим ялы, Сен аякларымы бүдремекден сакладың.