Zebur 54 - Мукаддес Китап

54‑нҗи мезмур

¹ Айдымчылар топарының ёлбашчысына. Киришли саз гуралында. Давудың маскили.

² Эй, Худай, гулак гой мениң догама, рет этме ялбарышымы.

^3-4 Мени үнсли диңле хем-де җогап бер, пикирлерим мени бирахат эдйәр; душманың сесинден яңа, эрбет адамың зулумындан яңа, мениң башым чашды. Чүнки олар маңа сүтем эдйәрлер, гахарларының аҗысыны пүркйәрлер.

⁵ Йүрегим эзъет чекйәр ичимде, өлүм ховпы абанды мениң үстүме.

⁶ Горкы билен галпылды үстүме инди, мени айылганч горкы гаплады.

⁷ Дийдим: «Вах, кепдери кимин ганатларым болсады! учуп гидип, асудалыкда болардым.

⁸ Хакыкы, узаклара – чөл-беевана тарап гачардым. Села

⁹ Гүйчли елден, гай-харасатдан гачалгама тарап мен ховлугардым».

¹⁰ Булашдыр, я Таңры, аларт агызларыны, чүнки гөрдүм шәхерде зорлук, җенҗели.

¹¹ Гиҗе-гүндиз диварларының үстүнде айланяр олар, онуң ичинде хорлук, эзъет бар.

¹² Онуң ортасында вейранчылык бар, зулум, хиле көчелеринден хич айрылмаяр.

¹³ Чүнки мени яңсылаян душман болсады – муңа чыдардым, мени йигренйән өзүни менден ёкары тутсады – ондан гизленердим.

¹⁴ Эмма муны эдйән сен, ягны өзүм билен дес-дең тутаным: мениң достум хем-де яраным.

¹⁵ Сениң билен йүрекден сөхбет эдердик, җемагат билен Худай өйүне биле гидердик.

¹⁶ Гой, өлүм оларың башына инсин, олар өлүлер дүнйәсине, гой, дири барсын, чүнки яманлык бар өйлеринде, араларында.

¹⁷ Мен болса чагырарын Худайы, халас эдер Реб мени.

¹⁸ Агшам, эртир, гүнорта чагы мен ялбарып, нала чекйәрин, Ол эшидйәр мениң сесими.

¹⁹ Маңа гаршы болан урушда Ол халас эдер мениң җанымы, чүнки көплер чыкды мениң гаршыма.

²⁰ Овалдан тагтында отуран Худай эшидер хем-де олара гайтавул берер. Чүнки оларда өзгеришлик ёк, Худайдан олар горканок.

²¹ Ёлдашым достуна элин галдырды хем-де эден әхтини бозды.

²² Онуң гепи балдан сүйҗүди, калбында болса уруш-җең барды. Онуң сөзлери ягдан юмшакды, аслында велин сырылан гылычды олар.

²³ Сен йүкүңи Реббиң үстүне йүкле, Ол сени сөйгетләр. Ол догры ынсаның ыранмагына хич хачан ыгтыяр этмез.

²⁴ Эмма Сен, эй, Худай, өлүм чукурына индерерсиң олары; ганхорлар ве хилегәрлер өмүрлериниң ярыны хем яшамаз; мен болса Саңа бил багларын.