Zebur 50 - Мукаддес Китап

50‑нҗи мезмур

1-2 Айдымчылар топарының ёлбашчысына. Давут Батшеба билен гүнә эденден соң, Натан пыгамбер онуң янына гелйәр. Шонда Давудың айдан мезмуры.

^1-2 Айдымчылар топарының ёлбашчысына. Давут Батшеба билен гүнә эденден соң, Натан пыгамбер онуң янына гелйәр. Шонда Давудың айдан мезмуры.

³ Эй, Худай, маңа рехим-шепагат эйле, Өз садык сөйгиңиң хатырасына; Өз мерхеметиңиң көплүгине гөрә, Сен өчүр мениң этмишлерими.

⁴ Сен мени бүтинлей юв языгымдан хем-де тәмизле мени гүнәмден.

⁵ Чүнки гүнәлерими боюн алярын, гүнәм элмыдама мениң өңүмде.

⁶ Саңа, диңе Саңа гаршы мен гүнә этдим, Сениң назарыңда яманлык этдим; шоңа гөрә, Сениң сөзлериң догры, чыкаран хөкүмиңде Сен адалатлы.

⁷ Хакыкы, мен гүнәли дүнйә инелим бәри, гүнәли мен энем гөвресинде галалым бәри.

⁸ Ине, Сен хакыкат ислейәрсиң йүрекде, даналыгы өвредйәрсиң мениң ичимде.

⁹ Мени кәкилик оты билен арассала, боларын мен пәк, мени юв, боларын мен гардан хем ап-ак.

¹⁰ Маңа эшитдир шатлыкдыр бегенч сесини, мени песелтдиң, инди болса, мен шатланайын.

¹¹ Мениң гүнәлеримден сов Сен йүзүңи хем-де өчүр мениң языкларымы.

¹² Эй, Худай, менде пәк йүрек ярат ве ичимдәки хакыкат рухуны өзгерт.

¹³ Сен Өз хузурыңдан мени ташлама, менден Мукаддес Рухуңы алма.

¹⁴ Өз халас эдишиңиң шатлыгыны Сен маңа гайтар, ыхласлы рух берип, маңа сөйгет бол.

¹⁵ Шонда Сениң ёлларыңы битабынлара өвредерин мен, гүнәкәрлер хем Саңа өврүлер.

¹⁶ Эй, Худай, мени халас эйлейән Худай! Дөкен ганымың гүнәсинден Сен мени гутар, дилим Саңа – Халасгәриме нагмалар айдар.

¹⁷ Я Таңры, ач Сен мениң агзымы, мениң дилим Саңа алкышлар айтсын.

¹⁸ Сен гурбанлык исләңок, ёгса берердим, якма гурбанлыклары берсем-де, разы болмарсың.

¹⁹ Сынык рух – Худайың гөвнүнден турян гурбанлык; эй, Худай, сынык, өкүнчли рухы Сен кемситмерсиң.

²⁰ Сиона Өз керемиң билен Сен ягшылык эт, ве Иерусалимиң диварларыны Сен дикелт.

²¹ Шонда догрулык гурбанлыклары, якма гурбанлыклары, тутуш якма гурбанлыклары-да Сениң гөвнүңден турар. Шонда Сениң гурбанлык сыпаларыңда өкүзлер садака берлер.