Zebur 47 - Мукаддес Китап

47‑нҗи мезмур

¹ Кораның несиллериниң нагмасы. Мезмур.

² Реб бейикдир, Худайымызың шәхеринде, Онуң мукаддес дагында Ол аша шөхратландырылмага мынасыпдыр.

³ Белент, гөзел Сион дагы тутуш ер йүзүниң шатлыгыдыр; Сион дагы Бейик Шаның шәхери, ол Сапон дагының чүр башы ялыдыр.

⁴ Худай онуң галасында Өзүни беркитме хөкмүнде танадяр.

⁵ Ине, патышалар агыз бирикдирдилер, билеликде ол ерлерден гечдилер.

⁶ Олар оны гөренлеринде хайран галдылар, довла дүшүп, гачып гитдилер.

⁷ Шол ерде сандырама тутды олары, догурян аялың бургусы ялы.

⁸ Гүндогар елиң Таршыш гәмилерини чым-пытрак эдиши ялы, Сен дерби-дагын этдиң олары.

⁹ Биз шәхериң шөхратыны эшитдик, инди болса оны: Хөкмүрован Реббиң шәхерини – Худайымызың шәхерини өзүмиз гөрдүк. Ол оны эбеди беркарар эдер. Села

¹⁰ Эй, Худай, ыбадатханаңда ойланярыс садык сөйгиң барада.

¹¹ Эй, Худай, Сениң адың дей, алкышың-да ериң дөрт күнҗүне етйәр. Сениң элиң адалатдан долудыр.

¹² Гой, Сион дагы бегенсин. Сениң адалатлы хөкүмлериң хатырасына, Яхуданың гызлары, гой, шат болсун.

¹³ Сионың дашында гезип, оны айланың, онуң диңлерини сиз санап чыкың.

¹⁴ Онуң ички беркитмелерине үнс бериң, гелҗек несле айтмак үчин, онуң көшклерине айланып чыкың.

¹⁵ Чүнки бу Худай шунуң ялыдыр, Ол эбеди ве бакы Худайымыздыр; өмүрбойы бизе ёл гөркезҗек Олдур.