Zebur 46 - Мукаддес Китап

46-нҗы мезмур

¹ Айдымчылар топарының ёлбашчысына. Кораның несиллериниң мезмуры.

² Эй, әхли халклар, эл чарпышың! Худая хешелле какың!

³ Бейик Худай-Ребден горкмалыдыр, чүнки Ол бүтин ер йүзүниң Бейик Шасыдыр.

⁴ Ол халклары бизиң голастымыза берди, миллетлери аяк астымыза чөкерди.

⁵ Реб сайлап-сечип, бизе юрт берди, биз – Онуң сөййән халкы. Села

⁶ Худай халкың шадыян сеслери билен, Реб сурнайларың сеслери билен ёкары чыкяр.

⁷ Нагма айдың, нагма айдың Худая, нагма айдың, нагма айдың Шамыза!

⁸ Чүнки Худай тутуш ериң Шасыдыр, Оңа мезмур билен нагмалар айдың.

⁹ Миллетлере хөкүмини йөредйәр Худай, Өз мукаддес тагтында отуряр Худай.

¹⁰ Ыбрайым Худайының халкына гошулмак үчин, халкларың асылзадалары йыгнанышдылар; чүнки тутуш ериң шалары Худайыңкыдыр; Ол беленде галдырыландыр.