Zebur 43 - Мукаддес Китап

43‑нҗи мезмур

¹ Айдымчылар топарының ёлбашчысына. Кораның несиллериниң маскили.

² Эй, Худай, гулагымыз билен эшитдик; аталарымызың дөврүнде, гадым эйямда олар бизе Сениң эденлериң барада гүррүң бердилер.

³ Миллетлери ковуп Өз элиң билен, Сен аталарымыза ер бердиң. Халклары вес-вейран эдип, Сен аталарымызы яйратдың.

⁴ Олар юрды эелемедилер гылыҗы билен, еңши газанмадылар голлары билен – Сениң элиң, голуң, йүзүңиң нуры эдендир муны; чүнки Сен җуда сөйдүң олары.

⁵ Сенсиң мениң Патышам хем-де Худайым. Якуп үчин еңишлери Сен буюр.

⁶ Душманларымызы басгыларыс Сениң кувватың билен, гаршыдашларымызы депгиләрис Сениң адың билен.

⁷ Мен өз яйыма бил багламаян, мени халас этмейәр мениң гылыҗым.

⁸ Сенсиң бизи халас эден душманларымыздан, Сенсиң бизи йигренйәнлери утанҗа гоян.

⁹ Узаклы гүн Худай билен магтанярыс Сениң адыңа бакы шүкүр эдерис. Села

¹⁰ Йөне инди бизи ташладың, утанҗа гойдуң, гошунларымыз билен биле гитмейәрсиң Сен.

¹¹ Бизи душмандан гачар ялы этдиң Сен, бизи йигренйәнлер бизи талаяр.

¹² Бизи гоюн кимин иймәге бердиң, Сен миллетлер арасында бизи пытратдың.

¹³ Сен Өз халкыңы хайырсыз сатдың, оларың бахасындан хайыр гөрмедиң.

¹⁴ Гоңшы халкларың өңүнде биз йүзүгара, гөз-гүлбан этдиң, төверек-даша этдиң масгара.

¹⁵ Миллетлериң дилине дүшүрдиң бизи, халклар яйкаярлар бизе башыны.

^16-17 Мыҗабат йөңкейәниң, дил етирйәниң сесинден яңа, душмандан ве өч аляндан яңа, узаклы гүн рысвалыгым гаршымда, мениң йүзүми утанч бүреди.

¹⁸ Башымыза инди буларың бары, йөне унудан дәлдирис Сени, хыянат этмедик Сениң әхтиңе.

^19-20 Бизиң йүрегимиз Сенден дәнмеди, әдимлеримиз Сениң ёлуңдан чыкмады. Сен болса бизи шагаллар меканында күл-пеекун этдиң, өлүм көлегеси билен Сен бизи өртдүң.

²¹ Эгер Худайымызың адыны унудан болсак, бир ят таңра эллеримизи узадан болсак,

²² Худая аян болмазмыды бу? Ол билйәр-ә йүрекдәки сырлары!

²³ Биз хер гүн Сениң үчин өлдүрилйәрис, биз дамагы чалынҗак гоюн сайылярыс.

²⁴ Оян, я Таңры, нәме үчин уклаяң? Галк Сен, бизи бакы ташлама.

²⁵ Нәме үчин Сен йүзүңи гизлейәң, мушакгат билен хасратымызы унудяң?

²⁶ Биз гара ере язылып гитдик, инди топракдан галып билемзок.

²⁷ Галк-да, бизе көмек эт, садык сөйгиң хатырасына бизи халас эт.