Zebur 40 - Мукаддес Китап

40-нҗы мезмур

¹ Айдымчылар топарының ёлбашчысына. Давудың мезмуры.

² Эҗизлере рехимли гараян нәхили багтлы! Яман гүнде Реб оны халас эдер.

³ Реб оны горар, аман галдырар, ер йүзүнде оңа багтлы диерлер; Сен душман элине оны бермерсиң.

⁴ Хассалык дүшегинде Реб онуң даянҗы болар, Реб оңа бүтинлей шыпа берер.

⁵ Мен дийдим: «Я Реб, маңа мерхемет эйле, шыпа бер, чүнки мен гүнәли Сениң өңүңде».

⁶ Душманларым мен барада эрбет гүррүң эдйәрлер. «Хачан өлүп, ады-соры йитер?» диййәрлер.

⁷ Олардан бири мени гөрмәге гелсе, ялан сөзлейәр, йүреги гыбат топлаяр, дашарык чыкандан соң, оны яйрадяр.

⁸ Мен барада пышырдашяр мени йигренйәнлериң бары, маңа гаршы яман ниет эдйәрлер.

⁹ Олар: «Ол өлүм ховплы бела учрады, ине, ятыр, инди галмаз» диййәрлер.

¹⁰ Хатда дузумы иен, бил баглан достум маңа хайынлык этди.

¹¹ Эмма Сен, я Реб, маңа мерхемет эйле, мени дикелт, мен оларың алмытыны берейин.

¹² Душманларым менден үстүн чыкмаса, Сениң менден хошалдыгыңы билерин.

¹³ Сен мени айыпсызлыгымда беркидйәң; Өз хузурыңда эбедилик дурузяң.

¹⁴ Ысрайылың Худайы Реббе алкыш болсун эзелден эбедә ченли! Омын! Омын!