Zebur 38 - Мукаддес Китап

38‑нҗи мезмур

¹ Айдымчылар топарының ёлбашчысы Едутуның мукамына лайыклыкда. Давудың мезмуры.

² Дийдим: «Дилимден гүнә галмазлык үчин, йөреҗек ёлумы сайгарҗакдырын; эрбетлер мениң гаршымда дурка агзымы җылавлап саклаҗакдырын».

³ Лал болуп, үмсүмлиги бозмадым, хатда ягшы затлары-да айтмадым; эмма бетерледи мениң агырым.

⁴ Йүрегим туташды мениң ичимде, от алавлады ой-хыялымда, ахырсоңы дилими ярдым:

⁵ «Билдир, я Реб, мениң соңумы хем-де галан гүнлеримиң саныны; билдир өмрүмиң паныдыгыны.

⁶ Сен мениң гүнлерими бир гарыш этдиң! Сениң назарыңда өмрүм пуч затдыр. Догрудан-да, хер бир ынсан елиң өвүсгини ялыдыр». Села

⁷ «Догрудан-да, ынсан гезйәр бир судур кимин; догрудан-да, бидерек ере ол хысырдаяр; йыгнаяр, мунуң киме галҗагыны билмейәр.

⁸ Я Таңры, инди нәмә гарашайын мен? Мениң әхли умыдым Сенде.

⁹ Әхли языкларымдан мени халас эт, мени акмаклара масгара этме.

¹⁰ Лал болуп, ачмаярын агзымы, чүнки Сен этдиң муны.

¹¹ Айыр менден Өз ургуларыңы, элиң зарбына йитип гидйәрин.

¹² Ынсаны гүнәсине гөрә паш эдип, темми береңде, гуванян затларыны гүе ялы даргадяң; догрудан-да, хер бир ынсан елиң өвүсгини ялыдыр!» Села

¹³ «Я Реб, мениң догамы эшит, гулак гой дат-перядыма; Сен бипарх гарама гөзяшларыма, чүнки мен гелмишек Сениң яныңда, әхли аталарым дей мен бир кесеки.

¹⁴ Назарыңы менден сов, гидип, ёк болмаздан өң бир ынҗалайын».