Zebur 36 - Мукаддес Китап

36-нҗы мезмур Алеф

Давудың мезмуры
Алеф

¹ Эрбет иш эдйәнлере җаныңы якма, найынсаплара хөвесли бакма.

² Чүнки олар тиз вагтда от кимин гурар, гөк өсүмлик кимин саралып солар.

Бет

Бет

³ Реббе бил багла, эт сен ягшылык, юртда яшап, яйна асудалыкда.

⁴ Ребден теселли тап, йүрек арзувларыңы Ол хасыл эдер.

Гимел

Гимел

⁵ Ёлуңы Реббе табшыр, Оңа бил багла, шонда Ол саңа хемаят берер.

⁶ Нур дей ялпылдадар догрулыгыңы, гүнорта чагы дей – хаклылыгыңы.

Далет

Далет

⁷ Үмсүм бол Реббиң өңүнде, Оңа сабырлы гараш, ёлы ровач бетниете хөвесли бакма.

Хе

Хе

⁸ Гахардан саклан, газабы ташла, аладачыл болма: ол шере элтер.

⁹ Чүнки кесилип ташланар пислик эдйәнлер, Реббе интизарлар ери мирас аларлар.

Вав

Вав

¹⁰ Аз-кем сабыр эт, эрбетлер ёк боларлар, ерлерине гөз айларсың, йөне тапмарсың.

¹¹ Пәлипес адамлар болса ери мирас аларлар, абаданчылыкда яшап, хезил эдерлер.

Зайин

Зайин

¹² Эрбет догры адама хыянат эдйәр хем-де оңа дишлерини гыҗаяр.

¹³ Таңры болса онуң үстүнден гүлйәр, чүнки онуң вагтының доляндыгыны гөрйәр.

Хет

Хет

¹⁴ Гарып билен мәтәҗи ере чалмаклык үчин, догры ёлдан барянлары өлдүрмек үчин, эрбет адамлар гылыч сырып, яйыны гуряр.

¹⁵ Эмма гылычлары өз йүреклерине санҗылар, оларың яйлары хем күл-оврам болар.

Тет

Тет

¹⁶ Догры ынсаның аз зады әхли эрбетлериң байлыгындан ягшыдыр.

¹⁷ Чүнки эрбетлериң голлары дөвлер, йөне Реб догрулары сөйгетләр.

Ёд

Ёд

¹⁸ Реб кәмиллериң гүнлерини билйәндир, оларың мирасы эбеди галар.

¹⁹ Олар яман вагты утандырылмаз, док боларлар ачлык дөврүнде.

Каф

Каф

²⁰ Эмма эрбетлер хеләк боларлар, Реббиң душманлары өрүлериң гөзеллиги дей йитип гидерлер, гайып боларлар, түссе ичинде сумат боларлар.

Ламед

Ламед

²¹ Эрбет адам карз алып, ызына бермез, догры ынсан болса җомарт ве эли ачык.

²² Чүнки Онуң ялканлары ери мирас аларлар, Онуң гарганлары болса гырлып ёк болар.

Мем

Мем

²³ Реб догрының гадамыны беркарар эдйәр, Ол онуң ёлундан гөвнүхош боляр.

²⁴ Йыкылмаз бу ынсан бүдрәенде хем, чүнки Реб онуң элинден тутяр.

Нун

Нун

²⁵ Яш йигитдим, инди гаррадым, йөне догры ынсаның терк эдиленини я зүрядының чөрек дилененини хениз гөрмедим.

²⁶ Элмыдама эли ачык хем-де карз берйәр; оларың неслинден ялканыш гелер.

Самех

Самех

²⁷ Шер ишден гача дур хем эт ягшылык – бакы яшарсың.

Айин

Айин

²⁸ Чүнки Реб адалаты сөййәндир, Ол садык ынсаны терк эдйән дәлдир; догры ынсан бакы горалар, йөне эрбетлериң зүрятлары гырлып ёк болар.

²⁹ Догры ынсанлар ери мирас аларлар хем-де онда бакы месген тутарлар.

Пе

Пе

³⁰ Догры адамың агзы даналыгы сөзлейәр, онуң дили адалаты беян эйлейәр.

³¹ Онуң йүрегиндедир Худайың кануны, тайян дәлдир онуң аягы.

Тсади

Тсади

³² Эрбет догры ынсаны аңтаяр, оны өлдүрмәге пурсат пейлейәр.

³³ Йөне Реб оны эрбедиң элине бермез; каза гетириленде, оны айыплы чыкармаз.

Коф

Коф

³⁴ Реббе умыт багла, Онуң ёлуны сакла, Ол хем ери мирас алмагың үчин сени бейгелдер; сен эрбетлериң ёк эдиленини гөрерсиң.

Реш

Реш

³⁵ Мен ызгытсыз эрбет адамың чынар дек гөгерен еринде яйрап отураныны гөрдүм.

³⁶ Бирденкә ол гайып болды-да гитди; мен оны гөзледим, эмма тапмадым.

Шин

Шин

³⁷ Кәмил ынсаны сынла, догры адама серет. Парахат ынсаның гелеҗеги бар.

³⁸ Эмма гүнәлилер бүтинлей вейран эдилер; эрбетлериң гелеҗеги ёк болар.

Тав

Тав

³⁹ Реб догры ынсанлары халас эдйәндир, мушакгатлыкда олара пена боляндыр.

⁴⁰ Реб олара көмек берер ве халас эдер; олары эрбетлерден гутарар ве халас эдер, чүнки олар Оны пена тутуняр.