Zebur 33 - Мукаддес Китап

33‑нҗи мезмур

¹ Давудың Абымелегиң өңүнде өзүни дәлилиге уран вагтындакы мезмуры. Абымелек Давуды ковандан соң, ол гитди.

Алеф

Алеф

² Мен Реббе хемише алкыш айдарын, Оңа өвги элмыдама агзымда болар.

Бет

Бет

³ Реб билен мениң җаным магтанар, песпәллер эшидер хем-де шат болар.

Гимел

Гимел

⁴ Мениң билен биле Ребби өвелиң, бейгелдели билеликде Онуң адыны.

Далет

Далет

⁵ Мен Ребби агтардым, Ол җогап берди хем-де әхли ховплардан мени халас эйледи.

Хе

Хе

⁶ Оңа назар салың, нурланарсыңыз, асла утандырылмаз сизиң йүзүңиз.

Зайин

Зайин

⁷ Мен-бичәре Ребби чагырдым, Ол хем эшитди, мени әхли азапларымдан халас эйледи.

Хет

Хет

⁸ Реб перишдеси Ондан горкянлары гуршаяр, олары бела-бетерден халас эйлейәр.

Тет

Тет

⁹ Дадып гөрүң Реб ягшылыгыны, Оны пена эдинйән нәхили багтлы!

Ёд

Ёд

¹⁰ Ребден горкуң, эй, Онуң мукаддеслери, Ондан горкянларың ёк мәтәчлиги.

Каф

Каф

¹¹ Хатда ёлбарслар хем чекйәр эҗир билен ачлыгы, Ребби агтарянлар болса чекмез хич мәтәчлиги.

Ламед

Ламед

¹² Гелиң, эй, огулларым, диңләң сиз мени, өвредейин сизе Ребден горкмагы.

Мем

Мем

¹³ Ислейәрмиң дөвран сүрмеги? Гөресиң гелйәрми ягшы гүнлери?

Нун

Нун

¹⁴ Яманлыкдан сакла сен өз дилиңи ве хилели гепден – додакларыңы;

Самех

Самех

¹⁵ яманлыкдан айрыл, эт сен ягшылык, парахатлык агтар, онуң ызындан галма.

Айин

Айин

¹⁶ Догры адамларда Реббиң гөзлери, перятларына ачык Онуң гулагы.

Пе

Пе

¹⁷ Реббиң йүзи беткәрлере гаршыдыр; олары ятламадан ер йүзүнде нышан галдырмаз.

Тсади

Тсади

¹⁸ Реб эшидйәр догрулар перят эденде, Ол олары әхли мушакгатларындан халас эйлейәр.

Коф

Коф

¹⁹ Реб калбы сыныклара якындыр; рухдан дүшенлери халас эдйәндир.

Реш

Реш

²⁰ Догры ынсаның дертлери көпдүр, эмма Реб әхлисинден оны халас эдйәндир.

Шин

Шин

²¹ Онуң әхли сүңклерини гораяр, оларың бири хем дөвүлмез.

Тав

Тав

²² Яманлык эрбет адамы өлдүрер, догры адамы йигренйән хөкүм эдилер.

²³ Реб Өз бенделерини халас эдйәндир, Оны пена эдинйәнлериң хич бири хөкүм эдилмез.