Zebur 29 - Мукаддес Китап

29-нҗы мезмур

¹ Давудың мезмуры. Ыбадатхана багыш эдиленде айдылян нагма.

² Я Реб, Сени бейгелтҗек, чүнки Сен ёкары мени галдырдың, мени душман гүлкүсине гоймадың.

³ Я Реб, Худайым, Саңа дат-перят этдим, Сен хем маңа шыпаңы бердиң.

⁴ Я Реб, Сен мениң җанымы өлүлер дүнйәсинден чыкарып алдың; габра инмезим ялы, яшайыш бердиң.

⁵ Эй, Реббиң садыклары, Оңа нагмалар айдың; мукаддес адына шүкүрлер эдиң.

⁶ Чүнки бир салымлык Онуң газабы; өмүрбойы довам эдйәр мәхрибанлыгы. Агшамдан даңа ченли агы яңланар, эртирине болса шадыхоррамлык гелер.

⁷ Мен шейле дийдим өз рахатлыгымда: «Мени асла хич зат сарсдырмаз».

⁸ Я Реб, Өз хошамайлыгың билен мени даг дек кувватлы этдиң; гизледиң Сен менден йүзүңи, шонда горкы гаплады мени.

⁹ Я Реб, Сени чагырдым; Таңрымдан мерхемет диләп, дат-перят этдим.

¹⁰ Дийдим «Мен өлүп, инемде габра, мунуң пейдасы болармы Саңа? Топрак Саңа өвги айдып билерми? Сениң вепалылыгыңы беян эдерми?»

¹¹ Я Реб, мени эшит-де, мерхемет эйле! Я Реб, Сен бол мениң көмекчим.

¹² Сен мениң ясымы тоя өвүрдиң, яс җулумы чыкарып, мени бегенч лыбасына беследиң.

¹³ Калбым Саңа нагма айтсын, дыммасын. Саңа бакы шүкүр этҗек, я Бейик Худайым!