Zebur 18 - Мукаддес Китап

18‑нҗи мезмур

¹ Айдымчылар топарының ёлбашчысына. Давудың мезмуры.

² Гөклер Худайың шөхратыны ыглан эдйәр, гөк гүммези эллериниң ишинден хабар берйәр.

³ Гүн сөз сөзлейәр эртирки гүне, гиҗе билим берйәр индики гиҗә.

⁴ Не геп бар, не-де бир гүррүң, эшидилмейәр сеси оларың.

⁵ Тутуш ер йүзүне яйрандыр олаң овазы, дүнйәниң дөрт күнҗегине – олаң сөзлери. Худай Гүн үчин гөклерде дикди чадыры,

⁶ Гүн гелин җайдан гиев дек чыкяр, ылгамакчы болян йүврүк кимин шатланяр.

⁷ Гөклер гөзъетиминден онуң чыкышы, бейлеки гөзъетимине онуң айлавы, хич бир зат гизлин дәл онуң ховрундан.

⁸ Реббиң кануны кәмилдир, ол җаны тәзелейәр. Реббиң дүзгүни ыгтыбарлыдыр, ол акмагы акылдар эдйәр.

⁹ Реббиң буйруклары догрудыр, олар йүреги шатландыряр. Реббиң табшырыклары айдыңдыр, олар гөзлери нурландыряр.

¹⁰ Ребден горкмак пәкдир, яшаяр ол эбеди. Реббиң карарлары ыгтыбарлыдыр, адылдыр оларың бары.

¹¹ Арзувлыдыр олар алтындан, хатда сап алтының көплүгинден-де; сүйҗүдир олар ары балындан, арың мум өйҗүгинден дамян балдан-да.

¹² Сениң бендәңе-де дуйдурыш берилйәр олар аркалы; олары берҗай этмекде бейик сылаг бар.

¹³ Эйсем өз ялңышыны ким аңып билйәр? Мени гизлин языклардан тәмизле.

¹⁴ Өз бендәңи гора бетпәллик гүнәлеринден, олар хөкүм сүрмесин мениң үстүмден; мен айыпсыз боларын шонда, пәк боларын гүйчли битабынлыкдан.

¹⁵ Агзымың сөзлери, йүрегимиң ой-пикирлери гой, Сениң хузурыңда кабул эдилсин, я Реб, мениң Гаям хем Халасгәрим.