Zebur 15 - Мукаддес Китап

15‑нҗи мезмур

1 Давудың миктамы

¹ Давудың миктамы Гора мени, эй, Худай, чүнки Сени пена тутунян.

² Реббе дийдим: «Сен мениң Таңрым, маңа Сенден өзге хич эшрет ёкдур».

³ Юртдакы мукаддес халка – шу абрайлы адамлара ымтыляр калбым.

⁴ Өзге худайлара эерйәнлер көпелдер өз хасратыны; мен гуймарын оларың гуйян ганлы ичги садакасыны, агзамарын оларың атларыны.

⁵ Реб мениң мирасым хем-де несибәм, Онуң элиндедир мениң ыкбалым.

⁶ Аҗайып ерлерден дүшди меллегим, гөвне якымлыдыр мениң мирасым.

⁷ Маңа маслахат берен Реббе алкыш айдарын; хатда гиҗелерине-де өвүт берйәр йүрегим.

⁸ Реб элмыдама гөзлеримиң өңүнде, сарсдырылмарын, чүнки Ол мениң сагымда.

⁹ Шоңа гөрә йүрегим бегенчли, калбым шатланяр, мениң теним хем асудалыкда яшаяр.

¹⁰ Чүнки мени өлүлер дүнйәсинде гоймарсың, Өз садыгың габра гирмегине Сен ёл бермерсиң.

¹¹ Яшайыш ёлуны маңа гөркезерсиң. Хузурыңда шатлык мени долдурар. Сагыңда хем бегенч мени долдурар.