Zebur 148 - Мукаддес Китап

148‑нҗи мезмур

¹ Реббе шан-шөхрат болсун! Гөклерден Ребби шөхратландырың, белентликлерде Оны шөхратландырың!

² Эй, әхли перишделери, Оны шөхратландырың! Эй, әхли гөгүң гошунлары, Оны шөхратландырың!

³ Эй, Ай ве Гүн, Оны шөхратландырың! Эй, әхли нурлы йылдызлар, Оны шөхратландырың!

⁴ Эй, гөклериң гөклери, эй, гөклериң үстүндәки сувлар, Оны шөхратландырың!

⁵ Гой, олар Ребби шөхратландырсын! Чүнки Ол буюрды, олар эмеле гелди.

⁶ Реб олары бакы, мүдими беркарар этди, хич үйтгемеҗек бир парзы берди.

⁷ Эй, земинде яшаянлар, Ребби шөхратландырың: эй, деңиз ләхеңлери, чуңлукларың әхлиси,

⁸ эй, от ве долы, гар ве думан, Онуң сөзүни берҗай эдйән тупан еллери,

⁹ эй, даглар ве байырларың әхлиси, мивели агачлар, кедр дарагтларың әхлиси,

¹⁰ эй, хайванлар ве әхли мал-гара сүйрениҗилер ве гушлар,

¹¹ эй, ер йүзүниң шалары, әхли халклары, шазадалар, дүнйәниң әхли хөкүмдарлары,

¹² эй, яш гызлар хем-де йигитлер, яшулулар хем-де чагалар.

¹³ Гой, олар Реббиң адыны шөхратландырсын, чүнки диңе Онуң ады бейгелдилендир, Онуң шан-шөхраты ерден-гөкден белентдир.

¹⁴ Ол Өз халкының кувватыны артдырды, шоңа гөрә, эй, Онуң әхли садыклары, Оңа якын болан ысрайыл халкы, Реббе шан-шөхрат болсун!