Zebur 144 - Мукаддес Китап

144‑нҗи мезмур

Давудың Ребби шөхратландырмак үчин айдан мезмуры

¹ Эй, Худайым, мениң Патышам! Мен Сени бейгелдерин, Сениң адыңа эбеди ве бакы алкыш айдарын.

² Саңа хер гүн алкыш айдарын, адыңы эбеди ве бакы шөхратландырарын.

³ Реб бейик, Ол ченсиз өвгә мынасып, Онуң бейиклиги ынсан аңына сыгмаз.

⁴ Сениң ишлериң несилербойы тарып эдилер, Сениң гудратлы ишлериң хем ыглан эдилер.

⁵ Сениң белентлигиңиң шанлы шөвкети, аҗайып ишлериң барада мен ойланарын.

⁶ Олар хайбатлы ишлериң гудратындан гүррүң берерлер, мен хем Сениң бейикдигиңи ыглан эдерин.

⁷ Сениң болелин ягшылыгың дабарасыны беян эдерлер, Сениң догрулыгың барада нагма айдарлар.

⁸ Реб мерхеметли хем рехимли, гиң гөвүнли, садык сөйгә байдыр.

⁹ Реб хеммелер үчин ягшыдыр, Ол әхли яраданларына мерхемет эдйәр.

¹⁰ Я Реб, әхли ишлериң Саңа шүкүр эдерлер, әхли садыкларың Саңа алкыш айдарлар.

^11-12 Сениң шалыгыңың шанлы шөвкетини, гудратлы ишлериңи ынсанлара билдирмек үчин, олар Сениң шалыгыңың шөхратыны айдарлар, Сениң гудратыңдан гүррүң берерлер.

¹³ Сениң шалыгың – мүдими шалык, хөкүмдарлыгың – несиллербойы. Реб әхли сөзлеринде вепадар, Ол әхли ишлеринде рехимдар.

¹⁴ Реб сөйгетлейәр әхли йыкыланлары, Ол дикелдйәр әхли бүкүленлери.

¹⁵ Хеммәниң гөзлери Саңа умыт билен гараяр, Сен өз вагтында оларың рыскыны берйәрсиң.

¹⁶ Сен элиңи ачярсың, әхли җандарлара ислән задыны берйәрсиң.

¹⁷ Реб әхли ёлларында догрудыр, Ол әхли ишлеринде рехим-шепагатлыдыр.

¹⁸ Реб Өзүни чагырянларың хеммесине, Өзүни чындан чагырянларың хеммесине якындыр.

¹⁹ Ол Өзүнден горкянлары мырадына етирйәр, оларың налышыны эшидйәр ве халас эдйәр.

²⁰ Реб Өзүни сөййәнлериң әхлисини гораяр, эмма эрбетлериң барыны Ол хеләк эдер.

²¹ Мениң агзым Реббе өвгүлер айдар, җанлы-җандарларың бары асырларбойы мукаддес адына алкышлар айдар!