Zebur 136 - Мукаддес Китап

136-нҗы мезмур

¹ Бабыл сувларының боюнда отурып, Сионы ятлан вагтымыз гөзяш дөкүпдик.

² Шол ердәки дерек агачларындан өз лираларымызы асып гоюпдык.

³ Бизи есир аланлар шол ерде нагма талап этдилер, бизе эзъет беренлер шадыянлыгы талап этдилер. «Бизе Сион нагмаларындан бирини айдың» дийдилер.

⁴ «Ят топракда ненең эдип Реббиң нагмасыны айдалы?!»

⁵ Эй, Иерусалим, эгер сени унутсам, гой, элим хүнәрини унутсын.

⁶ Эгер сени яда салмасам, Иерусалим шатлыгымың сересидир диймесем, гой, дилим дамагыма япышсын!

⁷ Я Реб, Иерусалимиң йыкылан гүни: «Оны юмруң, оны юмруң дүйбүне ченли!» диен эдомлары Сен ядыңа сал!

⁸ Эй, Бабыл гызы, эй, вейран болмуш, сениң бизе эденлериңи гайтарҗак нәхили багтлы!

⁹ Сениң балаларыңы даша урҗак нәхили багтлы!