Zebur 135 - Мукаддес Китап

135‑нҗи мезмур

¹ Реббе шүкүр эдиң, чүнки Ол ягшы, Онуң сөйгүси бакы.

² Худайлар Худайына шүкүр эдиң, Онуң сөйгүси бакы.

³ Таңрылар Таңрысына шүкүр эдиң, Онуң сөйгүси бакы.

⁴ Бейик гудратлары эдйән диңе Олдур, Онуң сөйгүси бакы.

⁵ Гөклери пайхас билен ярадан Олдур, Онуң сөйгүси бакы.

⁶ Ери сувларың үстүне язан хем Олдур, Онуң сөйгүси бакы.

⁷ Улы ышыклары ярадан Олдур, Онуң сөйгүси бакы.

⁸ Гүндиз хөкүм сүрер ялы Гүни ярадан Олдур, Онуң сөйгүси бакы.

⁹ Гиҗе хөкүм сүрер ялы Айы, йылдызлары ярадан Олдур, Онуң сөйгүси бакы.

¹⁰ Мүсүриң новбахарларыны өлдүрен Олдур, Онуң сөйгүси бакы.

^11-12 Гүйчли эли, узадан голы билен, ысрайыллары Мүсүрден чыкаран Олдур, Онуң сөйгүси бакы.

¹³ Гызыл деңзи икә бөлен Олдур, Онуң сөйгүси бакы.

¹⁴ Ысрайыллары онуң ортасындан гечирен Олдур, Онуң сөйгүси бакы.

¹⁵ Фараоны, гошуныны Гызыл деңизде дерби-дагын эден-де Олдур, Онуң сөйгүси бакы.

¹⁶ Өз халкына чөлде ёл гөркезен Олдур, Онуң сөйгүси бакы.

¹⁷ Бейик патышалары өлдүрен Олдур, Онуң сөйгүси бакы.

¹⁸ Кувватлы патышалары ёк эден Олдур, Онуң сөйгүси бакы.

¹⁹ Аморларың патышасы Сихоны ёк эден Олдур, Онуң сөйгүси бакы.

²⁰ Башаның патышасы Огы ёк эден Олдур, Онуң сөйгүси бакы.

²¹ Оларың топрагыны мирас хөкмүнде берен Олдур, Онуң сөйгүси бакы.

²² Оларың топрагыны мирас хөкмүнде Ысрайыла – Реббе хызмат эдйән халка берен-де Олдур, Онуң сөйгүси бакы.

²³ Пес гүнүмизде бизи ятлан Олдур, Онуң сөйгүси бакы.

²⁴ Душманларымыздан бизи халас эден Олдур, Онуң сөйгүси бакы.

²⁵ Әхли җанлы-җандара иймит берйән Олдур, Онуң сөйгүси бакы.

²⁶ Гөгүң Худайына шүкүр эдиң, Онуң сөйгүси бакы.