Zebur 134 - Мукаддес Китап

134‑нҗи мезмур

^1-2 Реббе шан-шөхрат болсун! Эй, Реббе хызмат эдйәнлер, Реббиң адыны шөхратландырың! Эй, Реббиң өйүнде, Худайымызың өйүниң ховлусында хызмат эдйәнлер, Ребби шөхратландырың!

³ Реббе шан-шөхрат болсун! Чүнки Реб ягшы. Онуң адына нагмалар айдың, чүнки бу өрән леззетли.

⁴ Чүнки Реб Өзи үчин Якуп неслини, Өз генҗи хөкмүнде Ысрайылы сечип-сайлады.

⁵ Мен билйәрин Реббиң бейикдигини, Таңрымызың әхли таңрылардан үстүндигини.

⁶ Гөклерде, ериң йүзүнде, деңизлерде, бар чуңлукларда Реб Өз гөвнүниң ислән задыны эдйәр.

⁷ Ол ериң учларындан булутлары турузяр, ягыш үчин йылдырымлар чакдыряр, Өз аммарларындан ели чыкаряр.

⁸ Ол Мүсүрде ынсанларың ве хайванларың илкинҗи догланларыны өлдүрди.

⁹ Эй, Мүсүр, Ол сениң ичиңе – фараоның, әхли хызматкәрлериниң үстүне аламатлары, мугҗызалары ёллады.

¹⁰ Ол көп миллетлери гырды, гүйчли патышалары өлдүрди:

¹¹ аморларың патышасы Сихоны, башанларың патышасы Огы ве әхли Кенган шалыкларыны.

¹² Оларың топрагыны мирас хөкмүнде, сайлама мүлк хөкмүнде Өз ысрайыл халкына берди.

¹³ Я Реб, Сениң адың эбеди, я Реб, Сен ятланарсың асырларбойы.

¹⁴ Реб Өз халкыны хаклы чыкарар, Өз бенделерине рехим-шепагат эдер.

¹⁵ Миллетлериң бутлары күмүш-тылладыр, олар ынсан эллериниң ишидир.

¹⁶ Оларың агзы бар, йөне гүрләнок, гөзлери бар, йөне гөренок.

¹⁷ Гулаклары бар, йөне эшиденок, агызларында хич бир дем хем ёк.

¹⁸ Шолар дек болар бутлары ясанлар, олара бил баглан әхли ынсанлар.

¹⁹ Эй, Ысрайыл несли, Ребби алкышлаң, эй, Харун несли, Ребби алкышлаң.

²⁰ Эй, Леви несли, Ребби алкышлаң, эй, Ребден горкянлар, Ребби алкышлаң.

²¹ Иерусалимде месген тутан Реббе Сиондан алкышлар болсун! Реббе шан-шөхрат болсун!