Zebur 113 - Мукаддес Китап

113‑нҗи мезмур

¹ Ысрайыл Мүсүрден чыкып гайданда, Якуп несли дили башга халкдан гайданда,

² Яхуда Худайың мукаддес өйүне, Ысрайыл хем Онуң шалыгына өврүлди.

³ Деңиз гөрүп, өкҗе гөтерди, Иордан дерясы терс угра акды.

⁴ Даглар бөкҗеклешди гочлар ялы, депелер хем – гузулар ялы.

⁵ Эй, деңиз, нәме үчин гачдың? Эй, Иордан дерясы, нәме үчин терсине акдың?

⁶ Эй, даглар, нәме үчин бөкҗеклешдиңиз сиз гочлар ялы, депелер хем – гузулар ялы?

^7-8 Гаяны сув ховзуна өвүрйән, чакмак дашы сув гөзбашына өвүрйән Реббиң өңүнде, Якуп Худайының өңүнде титре, ер йүзи!

⁹ Бизе дәл, я Реб, бизе дәл, сөйгиң ве вепадарлыгың хатырасына шан-шөхрат бер Сен Өзүңе!

¹⁰ «Ханы оларың Худайы?» дийип, нәме үчин миллетлер айтсын?!

¹¹ Бизиң Худайымыз гөклерде Ол гөвнүниң ислән задыны эдйәр.

¹² Миллетлериң бутлары күмүш, тылладыр, олар ынсан эллериниң ишидир.

¹³ Оларың агзы бар, йөне гүрлемейәр, гөзлери бар, йөне гөрмейәр.

¹⁴ Гулаклары бар, йөне эшитмейәр, бурунлары хем ыс-кок алмаяр.

¹⁵ Эллери бар, йөне хич зат дуймаяр, аяклары бар, йөне йөремейәр, богазларындан сес-үйн чыкмаяр.

¹⁶ Шолар дек болар олары ясанлар, ве олара бил баглан әхли ынсанлар.

¹⁷ Эй, Ысрайыл, Реббе бил багла! Ол сениң көмегиң хем-де галканың.

¹⁸ Эй, Харуның несли, Реббе бил багла! Ол сениң көмегиң хем-де галканың.

¹⁹ Эй, Ребден горкян, Оңа бил багла! Ол сениң көмегиң хем-де галканың.

²⁰ Реб бизи ядына салды, Ол бизе ак пата берер. Ол Ысрайылың неслине ак пата берер, Ол Харуның неслине ак пата берер.

²¹ Ребден горкянлара, улы-кичә ак пата берер;

²² гой, Реб сизи хем-де зүрятларыңызы көпелтсин;

²³ гой, гөги-ери ярадан Реб сизе ак пата берсин.

²⁴ Гөклер Реббиңкидир, ери болса Реб ынсан огулларына берди.

²⁵ Мерхумлар, габра инйәнлериң хич бири Ребби шөхратландырмаяр.

²⁶ Эмма шиндиден эбедә ченли, биз Реббе айтҗак алкышы. Реббе шан-шөхрат болсун!