Zebur 101 - Мукаддес Китап

101‑нҗи мезмур

¹ Дерде батан ве арзыны Реббиң өңүне дөкйән гөргүлиниң догасы

² Я Реб, догамы эшит, Саңа етсин мениң перядым.

³ Кын гүнүмде менден йүзүңи совма, гулак гой маңа, чагыран гүнүмде маңа тизрәк җогап берсене.

⁴ Чүнки гүнлерим түссе дей йитйәр, сүңклерим туташан одун дек яняр.

⁵ Йүрегим яралы, от дек гурады, менде чөрек иймәге ысгын галмады.

⁶ Иңңилдимиң зарындан яңа, мениң дерим сүңклериме япышяр.

⁷ Мен чөл-беевандакы бир хүви ялы, харабалыкдакы бир байгуш ялы.

⁸ Гөзүме асла гелмейәр укы, мен үчекдәки ялңыз гушҗагаз ялы.

⁹ Узаклы гүн душманларым мени яңсылаярлар, үстүмден гүлйәнлер адымы нәлетлейәрлер.

^10-11 Сениң гахар-газапларың зерарлы, күли чөрек кимин иййәрин, гөзяшларым гарылан ичги ичйәрин. Сен мени гөтерип, гыра ташладың.

¹² Агшам көлегеси дей мениң гүнлерим, мен от кимин саралып солдум.

¹³ Сен болса, я Реб, тагтда отырсың бакы, Сениң адың довам эдер несиллербойы.

¹⁴ Сен галкарсың, Сиона рехим эдерсиң, чүнки оңа мерхемет этмек вагтыдыр; етип гелди белленен вагт.

¹⁵ Сениң бенделериң онуң дашларыны эзиз гөрйәрлер, онуң вейранлыгына хайпы гелйәрлер.

¹⁶ Миллетлер горкар Реббиң адындан, дүнйә шалары горкар Онуң шан-шөхратындан.

¹⁷ Себәби Реб Сионы гайтадан гурар, шан-шөхратында Ол пейда болар.

¹⁸ Дыкгат берер пукараның догаларына, әсгермезлик этмез оларың дога-дилегне.

¹⁹ Инди догулҗаклар Ребби шөхратлар ялы, гой, бу гелҗек несил үчин язгы эдилсин.

^20-21 Чүнки туссагларың ахы-зарыны эшитмек үчин, өлүме хөкүм эдиленлери бошатмак үчин, Реб мукаддес белентлигинден ашак серетди, Ол гөклерден ере назар айлады.

^22-23 Ол халклар, шалыклар Реббе сежде этмәге үйшенлеринде, Сионда Реббиң адыны, Иерусалимде шан-шөхратыны ыглан этсинлер дийип, шулары этди.

²⁴ Ол орта ёлда мени тапдан дүшүрди, Ол мениң гүнлерими гысгалтды.

²⁵ Диййәрин: «Эй, мениң Худайым, өмрүмиң ярында дүнйәден алма. Сениң йылларың довам эдйәр несиллербойы».

²⁶ Сен гадымыетде ериң бинядын тутдуң, гөклер хем Сениң эллериңиң ишидир.

²⁷ Олар йитип гидер, Сен болса довам эдерсиң, олар көне эгинбаш кимин даргап гидерлер; Сен олары эгинбаш кимин чалшарсың, олар гечип гидерлер.

²⁸ Эмма Сениң шол өңкүлигиң, соңы ёкдур Сениң йылларың.

²⁹ Сениң бенделериңиң чагалары асуда яшар, оларың зүрятлары хузурыңда беркарар болар.