Закаря 9 - Мукаддес Китап

9-нҗы бап Ысрайылың душманлары җезаландырыляр

¹ Пыгамберлик сөзи. Бу Реббиң Хадрак юрдуна дегишли сөзүдир. Бу сөз Дамаск шәхеринде галар. Реббе дегишлидир Сирия шәхерлери ве ысрайыл тирелери.

² Бу сөз Хадрак билен арачәкдеш болан Хамат юрдуна, җуда парасатлы Сур билен Сидон шәхерлерине хем дегишлидир.

³ Сур өзүне беркитме гурды, гум кимин күмүш, көче хапасы ялы алтын үйшүрди.

⁴ Эмма Реб онуң бар йыгнанҗасыны элинден алар инди. Деңиздәки гүйҗүни ёк эдер, шәхери от ялмап-ювудар.

⁵ Оны гөрүп, Ашкелон горкар, Газа ызадан яңа җебир чекер, умытдан дүшен Экрон-да шейле эдер. Газаның шасы ёк эдилер, Ашкелон илатсыз галар.

⁶ Ашдотда дүрли миллетлерден гарышан халклар яшар, Мен пилиштлилериң текепбирлигиниң соңуна чыкарын.

⁷ Аларын агызларындан ганлы этлерин, дишлериниң арасындан неҗисликлерин. Аман галанлар Худайымыза дегишли болар, Яхуданың тиреси ялы болар, Экрон ябуслар кимин болар.

⁸ Горагчы хөкмүнде Өз меканымда дүшләрин, еке адам хем эйләк-бейләк гечмез. Сүтемкәр аман галанлара аралашмаз, чүнки инди олара хут Өзүм назар саларын.

Патыша гелйәр

⁹ Шатлан, эй, Сион гыз, шатлан! Эй, Иерусалим гызы, белент оваз билен гыгыр! Ине, Патышаң саңа тарап гелйәр. Адыл хем еңиҗидир Ол! Ол бир эшеге, эшегиң-де тайхарына мүнүп, пес гөвүнлилик билен саңа гелйәр.

¹⁰ Эфрайымың сөвеш арабаларыны, Иерусалимиң атларыны ёк эдерин, сөвеш яйлары омрулып ташланар. Ол халклара абаданчылыгы беркарар эдер. Хөкүмдарлыгы деңизден-деңзе, дерядан ериң учларына етер.

¹¹ Сизи болса гурбанлык ганы билен баглашан әхтим үчин, туссагдакыларыңызы гуррук гуюдан чыкарарын.

¹² Эй, умытлы есирлер, өз галаңыза доланың! Бу гүн сизе ики эссе берекет берҗекдигими җар эдйән.

¹³ Яхуданы яй ялы эдип эгерин, Эфрайымы болса шол яйың окы эдерин. Эй, Сион, огулларыңы греклере гаршы галдырарын! Сени элимде уршуҗының гылыҗы дек ойнарын.

¹⁴ Шонда Реб Өз халкының үстүнде пейда болар, йылдырым дей учар Онуң пейкамы. Хөкмүрован Реб сурнай чалар-да, гүнортадан харасат турзуп, ёла дүшер.

¹⁵ Хөкмүрован Реб халкыны горап саклар. Халк өз душманларыны ёк эдип, сапан билен урушянлары депеләп енҗерлер. Тойда шерап ичен ялы ичип гыгырышарлар. Олар гурбанлык легени ялы гандан долы болуп, гурбанлык сыпасының бурчлары кимин гандан доларлар.

¹⁶ Шол гүн оларың Худайы Реб халас эдер, чүнки олар чопан сүрүси киминдир. Олар тәҗиң гымматбаха гашлары ялы Худайың юрдунда шөхле сачарлар.

¹⁷ Нәхили аҗайып хем гөзел боларлар! Бол бугдай хем тәзе шерапдан гыз-йигитлер гүл ачарлар.