Закаря 6 - Мукаддес Китап

6-нҗы бап Секизинҗи аламат: дөрт сөвеш арабасы

¹ Мен ене-де середип дуркам, ики дагың арасындан чыкып гелйән дөрт сөвеш арабасыны гөрдүм. Ол даглар бүрүнчденди.

² Арабаларың бирине дор атлар, бейлекисине гара атлар,

³ үчүнҗи бирине ак атлар, соңкусына болса гүйчли гыр атлар гошуланды.

⁴ Мениң билен геплешен перишдеден: «Эй, җенабым, булар нәме?» дийип сорадым.

⁵ Перишде: «Булар бүтин ер йүзүниң Таңрысының хузурындан чыкян гөгүң дөрт рухудыр.

⁶ Гара атлара гошулан араба юрдуң демиргазыгына, ак атлара гошулан араба оларың ызындан гидйәр, гыр атлара гошулан араба болса гүнорта гидйәр» дийди.

⁷ Гыр атлар гидип, ер йүзүни айланмак ислейәрдилер. Перишде: «Барың, ер йүзүни айланың» дийди. Олар ер йүзүне айландылар.

⁸ Соңра ол мени чагырып: «Серет, демиргазык юрда гиден атлар ол ерде Мениң гахарымы көшешдирдилер» дийди.

Ешуваның башына тәч гейдирилйәр

⁹ Маңа Реббиң шу сөзи аян болды:

¹⁰ «Шу гүн Сепаняның оглы Ёшыяның өйүне гит-де, Бабыл сүргүнинден гайдып гелен Хелдайдан, Тобыядан хем-де Едаядан алтын-күмүш йыгна.

¹¹ Йыгнан алтын-күмшүңден бир тәч ясап, оны Ехосадагың оглы баш руханы Ешуваның башына гейдир.

¹² Хөкмүрован Реб шуны җар эдйәр дий: „Ине, Шаха диен адам. Ол өз орнундан шахалар чыкарар ве Реббе ыбадатхана гурар.

¹³ Хава, Реббе ыбадатхана гурҗак шолдур. Ол шалык шөхратыны газанар, тагтында отурып шалык сүрер. Онуң тагтының янында руханы болар ве ол икисиниң арасында ылалашыклы маслахат болар.

¹⁴ Бу тәчлер Хелдайың, Тобыяның, Едаяның хатырасына хем-де Сепаняның оглы Ёшыяның сахылыгының хатырасына Реббиң ыбадатханасында гойлар.

¹⁵ Узакда яшаянлар хем гелип, Реббиң ыбадатханасының гурлушыгына көмек эдерлер“». Шейлеликде, сизиң яныңыза мени Хөкмүрован Реббиң иберендигини билерсиңиз. Эгер сиз Худайыңыз Реббиң сөзүни берк тутсаңыз, гурлушык бабатда бу айдыланлар амала ашар.