Закаря 5 - Мукаддес Китап

5‑нҗи бап Алтынҗы аламат: учян кагыз

¹ Онсоң середип дуркам, учуп йөрен бир язгылы кагыза гөзүм дүшди.

² Перишде маңа: «Нәме гөрйәң?» дийди. Мен: «Бир кагыз-а учуп йөр; онуң бойы йигрими тирсек, ини он тирсек» дийип җогап бердим.

³ Ол маңа шейле дийди: «Бу бүтин дүнйә сиңйән нәлетдир. Бу кагызың бир тарапында язылышы ялы, огурлык эден согрулып ташланҗакдыр, бейлеки тарапында язылышы ялы болса, яландан ант ичен ковлуп чыкарылҗакдыр.

⁴ Мен оны ёлладым. Ол огрының хем-де Мениң адымдан яландан ант ичйәниң өйүне гирер ве шол өйде-де галар; агач-тагтасыдыр дашлары билен биле өйи ювудар. Муны Хөкмүрован Реб айдяндыр».

Единҗи аламат: ичи аяллы күйзе

⁵ Соңра мениң билен геплешен перишде өңүме гечди-де: «Ёкарыңа серет, шол гелйән задың нәмедигини гөр» дийди.

⁶ Мен: «Ол нәме?» дийип сорадым. Ол маңа: «Ол гелйән күйзедир. Бу тутуш юрдуң этмишидир» дийди.

⁷ Соңра гуршун гапак ёкары гөтерилди: күйзәниң ичинде бир аял отырды.

⁸ Перишде: «Бу шердир» дийди. Аялы күйзәниң ичине итекләп гойберди-де, гуршун гапагы мәкәм ерине япды.

⁹ Соңра мен середип дуркам, ики аялың гелйәндигини гөрдүм. Олар шемала ганатларыны яйып, учуп гелйәрдилер. Оларың ганаты леглегиң ганаты ялыды. Олар ер билен гөгүң аралыгында күйзәни гөтерип әкитдилер.

¹⁰ Мен перишдеден: «Олар күйзәни нирә алып барярлар?» дийип сорадым.

¹¹ Ол маңа: «Шингар юрдуна; шол ерде оңа өй гурҗаклар. Өй тайяр боланда, олар күйзәни шонуң ичинде өз еринде гоярлар» дийди.