Закаря 14 - Мукаддес Китап

14‑нҗи бап Соңкы сөвеш

¹ Ине, Реббиң гүни гелйәр! Эй, Иерусалим халкы, сизден алнан олҗа өз гөзүңизиң алнында пайлашылар.

² Мен Иерусалимиң гаршысына урушмак үчин әхли миллетлери йыгнарын. Шәхерлер басылып алнар, өйлер таланар, аяллар зорланар. Шәхер халкының ярысы сүргүн эдилер, йөне халкың галан бөлеги шәхерден чыкарылмаз.

³ Онсоң Реб чыкып, сөвеш гүнүндәки ялы эдип, шол халкларың гаршысына уршар.

⁴ Шол гүн Онуң аягы гүндогарда – Иерусалимиң өңүндәки Зейтун дагында болар. Бу даг гүндогардан гүнбатара әгирт улы җүлге болуп, икә бөлүнер; дагың ярысы демиргазыга, ярысы гүнорта чекилер.

⁵ Сиз Реббиң дагының җүлгесиниң ичи билен гачарсыңыз, себәби ол җүлге Аселе ченли узалып гидер. Сиз шонда Яхуда патышасы Узыяның дөврүнде болан ертитремеден гачышыңыз ялы гачарсыңыз. Шол вагт мениң Худайым Реб әхли мукаддеслер билен биле гелер.

⁶ Шол гүн ышык болмаз, асмандакы ышык чешмелери доңар.

⁷ Ол диңе Реббе аян болан айратын бир гүн болар. Ол не гүндизе меңзәр, не-де гиҗә; агшамына ягты болар.

⁸ Шол гүн Иерусалимде сув җошар. Сувуң ярысы гүндогардакы деңзе, ярысы гүнбатардакы деңзе акар. Бу гышына-да, томсуна-да шейле довам эдер.

⁹ Реб тутуш ер йүзүниң Шасы болар. Шол гүн Реб еке-тәк Реб болар ве Онуң ады еке-тәк ат болар.

¹⁰ Гебадан Иерусалимиң гүнортасындакы Риммона ченли тутуш юрт дүзлүге өврүлер. Эмма Иерусалим Бенямин дервезесинден өңки дервезәниң ерлешен ерине, Чүңк дервезесине ченли, ягны Хананел диңинден патышаның үзүм сыкылян ерине ченли аралыкдакы белентликде галар.

¹¹ Иерусалимде адамлар яшар, ол индиден бейләк ёк эдилмез. Шәхер ховпсуз болар.

¹² Иерусалимиң гаршысына уршан миллетлери Реб шу белалар билен җезаландырар: хениз аяк үстүнде гезип йөркәлер – тенлери, ханасындака – гөзлери, агызларындака – диллери чүйрәр.

¹³ Шол гүн олары Реб улы алҗыраңңылыга салар, хер ким өз гапдалындакының элинден тутар, бири-бирине юмрук саларлар.

¹⁴ Хатда яхудалар-да Иерусалимде уршарлар. Даш-төверекдәки әхли миллетлериң байлыгы: улы мөчберде алтын-күмши, гейимлери йыгналар.

¹⁵ Атлардыр гатырлара, дүелердир эшеклере хем-де оларың дүшелгелеринде болан бейлеки әхли хайванлара-да шунуң ялы белалар билен җеза берлер.

¹⁶ Иерусалимиң үстүне чозан миллетлерден аман галанлары Патыша, ягны Хөкмүрован Реббе ыбадат этмек хем-де Чатма байрамыны беллемек үчин йылың-йылына Иерусалиме гидерлер.

¹⁷ Патыша, ягны Хөкмүрован Реббе ыбадат этмек үчин ер йүзүндәки халклардан Иерусалиме гитмедиклер ягыш гарасыны гөрмез.

¹⁸ Эгер Мүсүр несли хем гидип, шуны берҗай этмесе, Реб олара-да Чатма байрамыны беллемәге гитмедик халкларың башындан индерен беласыны индерер.

¹⁹ Мүсүриң хем-де Чатма байрамыны беллемәге гитмедик миллетлериң әхлисиниң җезасы шейле болар.

²⁰ Шол гүн хатда атларың җаңҗагазларына-да «Реббе багыш эдилен» дийип язылар; Реббиң ыбадатханасындакы газанлар хем гурбанлык сыпасының өңүндәки җамлар ялы болар.

²¹ Иерусалимдәки хем-де Яхудадакы хер бир газан Хөкмүрован Реббе багыш эдилер. Гурбанлык бермәге геленлер олары гурбанлык этини биширмек үчин уланарлар. Шол гүнден бейләк Хөкмүрован Реббиң ыбадатханасында екеҗе-де сөвдагәр болмаз.