Закаря 12 - Мукаддес Китап

12‑нҗи бап Иерусалимиң еңши

¹ Пыгамберлик сөзи. Бу Реббиң Ысрайыл хакындакы сөзүдир. Гөги яян, ери эсасландыран ве ынсан рухуны ярадан Реб шейле диййәр:

² «Мен Иерусалими даш-төверегиндәки халклар үчин башыңы айлаян шераплы бир кәсе эдерин. Иерусалим габава дүшенде, бу кәседен Яхуда-да ичер.

³ Шол гүн Мен Иерусалими әхли миллетлер үчин агыр даш эдерин. Оны гөтеренлериң әхлиси өзлерине зепер етирер. Ер йүзүниң әхли миллетлери бирлешип, Иерусалимиң гаршысына чыкарлар.

⁴ Шол гүн Мен атларың барыны гудузладарын, үстүндәкилери болса дәлиредерин. Бейлеки халкларың атларының гөзлерини көр эдерин, эмма Яхуда неслини Өз назарымда сакларын. Муны Реб айдяндыр.

⁵ Шонда Яхуда баштутанлары өз-өзлерине: „Өзлериниң Худайы Хөкмүрован Ребде кувватланан Иерусалимиң халкы бизиң гуҗур-гайратымыздыр“ диерлер.

⁶ Шол гүн Мен яхуда баштутанларыны одуң ортасында янян бир маңңал ялы, бугдай дессесиниң ичинде алавлап янян чыра ялы эдерин. Олар саг-солундакы халкларың әхлисини якып-яндырарлар. Иерусалим ене-де өзүниң өңки еринде отурар».

⁷ Давудың несиллериниң хем-де Иерусалимиң халкының шөхраты Яхудадан өңе гечмез ялы, Реб илки яхуда халкына еңиш берер.

⁸ Реб шол гүн Иерусалимиң халкыны горар. Оларың иң эҗизи Давут ялы болар. Давудың несли Худай ялы, өңе чыкан Реббиң перишдеси ялы болар.

Тутуш юртда яс тутарлар

⁹ «Шол гүн Мен Иерусалимиң гаршысына чыкян миллетлериң әхлисини дерби-дагын этмәге гиришерин.

¹⁰ Мен Давудың неслиниң хем-де Иерусалимиң халкының үстүне мерхемет ве ялбарыш рухуны дөкерин. Олар өзлериниң дешим-дешим эденине, ягны Маңа середерлер, ялңыз оглы үчин яс тутян ялы яс тутарлар, новбахар оглы үчин ахы-нала чекйән ялы аҗы гөзяш дөкерлер.

¹¹ Шол гүн Иерусалимде тутулҗак яс Мегидо дүзлүгиндәки Хадатриммонда тутулан яс ялы агыр болар.

¹² Юртда хер ковумың машгаласы өзбашдак, аяллары айры, эркеклери айры яс тутар: Давудың ковумының эркеклери айры, аяллары айры; Натаның ковумының эркеклери айры, аяллары айры;

¹³ Левиниң ковумының эркеклери айры, аяллары айры; Шимгиниң ковумының эркеклери айры, аяллары айры;

¹⁴ шейле хем әхли галан ковумларың эркеклери айры, аяллары айры яс тутар».