Ýowel 3 - Мукаддес Китап

3‑нҗи бап Реб миллетлере җеза берҗек

¹ «Ине, шонда, Яхуда билен Иерусалимиң өңки абаданчылыгыны дикелден гүнлеримде,

² Мен әхли миллетлери йыгнап, олары Ехошапат җүлгесине гетирерин, сайлан ысрайыл халкымы миллетлер арасында пытрадандыгы үчин, Мен шол ерде олара хөкүм чыкарарын. Олар Мениң топрагымы бөлдүлер,

³ Мениң халкым үчин биҗе атдылар, огланы лолы үчин, гызы шерап ичмек үчин сатдылар.

⁴ Эй, Сур, Сидон ве әхли Пилишт велаятлары, сиз кимсиңиз Мениң үчин? Сиз Маңа гайтавул берйәрсиңизми? Эгер гайтавул берйән болсаңыз, Мен сизиң эденлериңизи окгунлылык билен тизара башыңыза саларын.

⁵ Чүнки сиз Мениң алтын-күмшүми, сайлама хазынамы бутханаларыңыза әкитдиңиз.

⁶ Сиз Яхуда ве Иерусалим халкларыны өз чәклеринден узаклашдырып, олары грек халкына сатдыңыз.

⁷ Инди болса олары шол ерден аяга галдырып, эденлериңизи өз башыңыза салян Мендирин.

⁸ Мен сизиң огулдыр гызларыңызы Яхуда халкына сатарын, ол хем сизиң чагаларыңызы узакдакы Шебалылара сатар». Муны Реб айтды.

⁹ Муны халклар арасында җар эдиң: «Сөвеш үчин тайярлык гөрүң, батырлары аяга галдырың, гой, эсгерлериң бары җемленсин.

¹⁰ Азалларыңыздан гылычлар, оракларыңыздан найзалар ясаң; эҗиз „мен гүйчли“ дийсин.

¹¹ Эй, төверекдәки әхли миллетлер, ховлугың, үйшүп йыгнаның! Я Реб, ашак индир Өз батырларыңы!»

¹² «Гой, миллетлер галкынсын, Ехошапат җүлгесине инсин, чүнки чар тарапдан гелен миллетлере хөкүм чыкармак үчин, Мен шол ерде отурҗак.

¹³ Оракларыңызы ишледиң, чүнки хасыл етишди; үзүм сыкылян ери долы, Челеклер долуп дашянча басгылаң. Чүнки хетден ашды писликлери миллетлең».

¹⁴ Хөкүм җүлгесинде Биргиден мәхелле, әгирт мәхелле! Чүнки Реббиң гүни хөкүм җүлгесине голайдыр.

¹⁵ Гүнүң, Айың йүзи гараляр, йылдызлар хем шөхлесини сачмаяр.

¹⁶ Реб гүммүрдейәр Сиондан хем сесленйәр Иерусалимден. Асман билен ер лерзана гелйәр. Эмма Реб Өз халкына пенадыр, хем ысрайыл халкы үчин галадыр.

¹⁷ «Шонда Мен Бейик Худайыңызың мукаддес дагым Сионда месген тутандыгымы билерсиңиз. Иерусалим хем мукаддес болар, кесекилер оны басып алмаз хич хачан.

¹⁸ Шол гүн шейле болар: Даглардан тәзе шерап дамар, байырлардан сүйт акар, Яхуда җарларының әхлиси сувдан долар. Реббиң өйүнден гөзбаш ярылып, Шитим җүлгесиниң гуры җарларыны гандырар.

¹⁹ Вейран болар Мүсүр, дөнер чөллүге Эдом, чүнки олар яхуда халкына этдилер сүтем; боядылар топракларыны бигүнә гана.

²⁰ Йөне бакы месген болар Яхуда, Иерусалим-де болар несилден-несле.

²¹ Мен аларын ганларының хунуны хем-де акламарын гүнәни, чүнки Реб Сионда месген тутяндыр».