Ýowel 1 - Мукаддес Китап

1‑нҗи бап

¹ Петувалың оглы Ёвеле Реббиң шу сөзи аян болды:

Лешгер хүҗүм эдйәр

² Эй, яшулулар, диңләң сиз муны, сиз хем гулак гоюң, тутуш юрдуң илаты: сизиң гүнлериңизде я аталар дөврүнде, хей-де, болупмыды шулар ялы зат?

³ Сиз муны етириң чагаларыңыза, олар хем айтсын өз чагаларына, оларың чагалары-да индики несле.

⁴ Юмуртгадан чыкан чекиртгеден артан хасылы ганат багламадык чекиртге ийди. Ондан артаны ганат баглан чекиртге ийди, ганат баглан чекиртгеден артан хасылы гемриҗи чекиртге сүрүси ийди.

⁵ Эй, серхошлар, айңалың-да, аглаң сиз, тәзе шерап үчин налаң, оны ичйәнлер, чүнки тәзе шерап агзыңыздан кесилди.

⁶ Себәби мениң топрагыма уммасыз, гүйчли бир лешгер чозды; арсланыңкы ялы онуң дишлери, эне ёлбарсыңкы дей гыйык дишлери.

⁷ Ол вейран этди үзүм шахаларымы, чапым-чапым этди инҗир агачларымы, шахаларының габыгыны сыпырып, ере ташлады; үзүм шахалары-да агарып галды.

⁸ Сөйгүли адаглысыны йитирип, җул гейнен гыз кимин ах чекип, нала!

⁹ Реббиң өйүнден кесилди инди галла хем-де ичги садакалары. Реббе хызмат эдйән руханылар тутярлар ясы.

¹⁰ Мейданлар бошады, топрак аглаяр, чүнки вейран болды онуң галласы. Шерап гурап галды, зейтун-да солды.

¹¹ Эй, дайханлар, арпа-бугдай үчин гамланың, үзүм багбанлары, сес эдип аглаң, чүнки вейран болды мейдан галласы,

¹² гурап галды үзүм агаҗы, солуп галды инҗир агаҗы. Нар, алма, хурма – мейдандакы багларың гурады бары. Гутарды шол себәпден ынсан шатлыгы.

¹³ Эй, руханылар, җул гушаның, яс тутуң! Эй, гурбанлык сыпасында хызмат эдйәнлер, дат-перят эдиң! Эй, Худайымың хызматкәрлери, гиҗәңизи җул ичинде гечириң! Чүнки галла, ичги садакалары кесилендир Худайыңызың өйүнден.

¹⁴ Агыз беклемәге белләң сиз вагты, җар эдиң мукаддес йыгнанышыгы. Яшулулары хем-де тутуш юрдуң халкыны йыгнаң Бейик Худайыңызың өйүне хем-де Реббе дат-перят эдиң.

¹⁵ Дат ол гүне! Чүнки Реббиң гүни якындыр. Гудратыгүйчлүден Вейранчылык гүни кимин гелйәр ол.

¹⁶ Эйсем гөзүмизиң алнында ийҗегимиз, Худайымызың өйүнден-де шатлыкдыр багтыярлык кесилмейәрми?

¹⁷ Тохумлар чүйреди кесек астында, аммарлар хем гугарып галды, галла аммарлары чагшап дагады, чүнки галла экинлери хасыл бермеди.

¹⁸ Мал-гара ненеңси зарын ыңраняр! сыгыр сүрүлери ыранып баряр, чүнки олар үчин ёкдур яйлалар; гоюн сүрүлери-де ысгындан дүшен.

¹⁹ Я Реб, Саңа дат-перят эдйән, чүнки яйлалары от ялмап ювутды, мейдан агачларының барыны ялын көйдүрди.

²⁰ Саңа перят эдйәр хатда чөл хайванлары, чүнки гурап галды сув акарлары, от хем ялмап ювутды гөк яйлалары.