Ýeşuwa 8 - Мукаддес Китап

8‑нҗи бап Ысрайыллар Ай галасыны вейран эдйәрлер

¹ Соңра Реб Ешува шейле дийди: «Хич затдан горкма ве довла дүшме. Өз уршуҗыларыңың әхлисини ал-да, гөни Ай галасына йөриш эт. Гөрйәңми, Мен Ай галасыны, онуң ханыны, адамларыны ве ерини сениң элиңе берҗекдирин.

² Сен Ерихо галасы билен онуң ханыны нәме эден болсаң, Ай галасы билен онуң ханыны хем шонуң ялы эт. Йөне ондан олҗа алан затларыңызы ве мал-гараларыңызы өз араңызда пайлашың. Дуйдансыз чозмага тайяр болуп, бир бөлегиңиз галаның еңсесинде букуда отурың».

³ Ешува ве әхли гошун Ай галасына гитмек үчин ерлеринден турдулар, Ешува оларың арасындан отуз мүң саны эдермен уршуҗыны сайлап алып, олары гиҗе угратды.

⁴ Ешува олара шейле буйрук берди: «Сиз галаның арка тарапында, онуң еңсесинде букуда отурарсыңыз. Галадан гаты узага гитмәң ве хеммәңиз тайяр болуп дуруң.

⁵ Мен янымдакы ёлдашларым билен гала голай барарыс. Шол вагт Айың яшайҗылары эдил өңки гезекки ялы бизиң гаршымыза чыкып уграрлар велин, биз олардан гачып башларыс.

⁶ Олар бизиң ызымыздан ковалап гайдарлар. Биз оларың үнсүни галадан соварыс, себәби олар бизи эдил өңки гезекки ялы, өзлеринден гачяндырлар өйдерлер. Биз олардан гачян махалымыз,

⁷ сиз букудан чыкып, галаны эеләң. Чүнки Худайыңыз Реб бу галаны сизиң элиңизе берҗекдир.

⁸ Галаны эеләниңизде, Реббиң буйрушы ялы, оны отлаң. Хут мениң табшырышым ялы эдиң!»

⁹ Шейлеликде, Ешува олары угратды. Олар букуда отурмак үчин гитдилер. Олар Ай галасының гүнбатар тарапында, Бейтел билен Айың аралыгында ерлешдилер, эмма Ешува галан адамлар билен гиҗәни дүшелгеде гечирди.

¹⁰ Ешува эртеси ирден туруп, адамларың хеммесини йыгнады. Ол Ысрайыл яшулулары билен гошуның өңүне дүшүп, Ай галасына тарап уграды.

¹¹ Онуң билен биле уршуҗыларың әхлиси гитди, олар галаның эсасы гирелгесине голайлашдылар. Олар Айың демиргазык тарапындан гелип дүшледилер. Инди олар билен Ай галасының арасында диңе җүлге барды.

¹² Соңра Ешува бәш мүңе голай адамы галаның гүнбатарында, Бейтел билен Айың аралыгында букуда отуртды.

¹³ Гошуның аграмлы бөлеги галаның демиргазыгында, галан бөлеги гүнбатарында ерлешди. Ешува болса шол гиҗәни җүлгеде гечирди.

¹⁴ Бу затлары гөренде Ай галасының ханы ве онуң әхли адамлары чалт херекет этдилер. Галаның ханы эркек адамлары билен биле ирден туруп, шол вагтың өзүнде Араба дүзлүгиниң өңүне, ысрайыллар билен сөвешмәге өңки ере чыкды. Эмма өзи үчин галаның еңсесинде дузак гурландыгындан Айың ханының хабары ёкды.

¹⁵ Ешува ве әхли ысрайыллар, хамала, олардан еңилйән ялы болуп, чөле тарап гачдылар.

¹⁶ Оларың ызындан ковмак үчин галадакы әхли эркек адамлар чагырылды. Оларың хеммеси биригип, Ешуваның ве онуң гошунының ызындан ковалап, галадан дашлашдылар.

¹⁷ Айда ве Бейтелде ысрайылларың ызындан коваламадык екеҗе-де эркек адам галмады. Шейдип, олар өз галасыны горагсыз, алаң-ачык галдырдылар.

¹⁸ Шонда Реб Ешува: «Элиңдәки найзаны Ай галасына тарап узат, себәби Мен оны сениң элиңе берҗек» дийди. Шейлеликде, Ешува элиндәки найзасыны гала тарап узатды.

¹⁹ Ол элини узадан бадына, букуда отуранлар чаласынлык билен отуран ерлеринден чыкып, гала тарап окдурылдылар. Олар галаны эеләп, деррев оны ода бердилер.

²⁰ Ай галасының адамлары ызларына середенде, галаның түссесиниң ал-асмана галандыгыны гөрдүлер. Оларың аңры хем, бәри хем гачара ери ёкды. Себәби чөле гачып барян ысрайыллар хем ковгучылара гаршы өврүлипдилер.

²¹ Ешува ве әхли ысрайыллар букуда отуранларың галаны эеләндиклерини ве галаның түссесиниң асмана галандыгыны гөрүп, ызларына доландылар ве Айың адамларыны гырмага башладылар.

²² Галаны эелән гошун душманың өңүнден чыкып, олары ысрайылларың орталыгында галар ялы эдип, әхли тарапдан габадылар-да, бир адамы хем дири галдырман я-да гачырман, барыны гырдылар.

²³ Диңе Ай галасының ханыны дири тутуп, оны Ешуваның янына гетирдилер.

²⁴ Ысрайыллар Ай галасының әхли илатыны оларың өзлерини ковалап элтен еринде гырдылар. Оларың иң соңкусы өлдүриленден соң, әхли ысрайыллар Ай галасына тарап өврүлдилер ве ол ердәкилери гылыч билен вейран этдилер.

²⁵ Тутуш Ай галасында шол гүн өлдүрилен илатың, аял-эркек әхлисиниң җеми он ики мүң саны болды.

²⁶ Ешува болса тә Айың әхли илатыны бүтинлей ёк эдип гутарянчалар, узадан найзалы элини ашак гойбермеди.

²⁷ Реббиң Ешува буйрушы ялы, ысрайыллар ол галаның диңе мал-гарасыны ве талап алан затларыны өзлерине олҗа эдип алдылар.

²⁸ Шейлеликде, Ешува Ай галасыны ода якды ве оны тә шу гүнлере ченли өмүрлик харабачылыга өвүрди.

²⁹ Ай галасының ханыны болса тә агшам дүшйәнчә агачдан асып гойды. Гүн яшан бадына, Ешува онуң җеседини агачдан дүшүрип, галаның дервезесиниң гирелгесиниң өңүне ташламагы буюрды. Онуң үстүне түммек эдип, даш үйшүрдилер. Шол даш үйшмеги бизиң гүнлеримизе ченли сакланып галыпдыр.

Ешува Мусаның кануныны окаяр

³⁰ Шол вагт Ешува Эйбал дагында Ысрайыл Худайы Реббе гурбанлык сыпасыны гурды.

³¹ Реббиң гулы Мусаның ысрайыллара буйрушы ве онуң Канун китабында язылышы ялы, гурбанлык сыпасы демир дегмедик дашлардан гурулды. Онуң үстүнде Реббе якма хем-де саламатлык гурбанлыкларыны бердилер.

³² Ешува ысрайылларың гатнашмагында шол дашларың йүзүне Мусаның канунының нусгасыны язды.

³³ Әхли ысрайыллар, онуң яшулулары, ёлбашчылары, казылары ве оларың арасындакы гелмишеклер Реббиң Әхт сандыгыны гөтерйән леви руханыларының гаршысында, оларың хем аңры гапдалындан, хем бәри гапдалындан ики топар болуп дурдулар. Реббиң гулы Мусаның: «Худайың ак патасыны алмалы пурсадыңыз геленде, шейле дуруң» дийип буйрушы ялы эдип, оларың ярысы Геризим дагының өңүнде, бейлеки ярысы болса Эйбал дагының өңүнде дурдулар.

³⁴ Соңра Канун китабында язылышы ялы, Ешува әхли алкыш ве нәлет сөзлерини екеме-еке гаты сес билен окады.

³⁵ Тутуш Ысрайыл җемагатының, аялларың, чагаларың ве оларың арасындакы гелмишеклериң өңүнде Ешува Мусаның әхли буйрукларыны еке сөз хем галдырман окады.