Ýeşuwa 6 - Мукаддес Китап

6-нҗы бап Ерихо галасы йыкыляр

¹ Онсоң Реб Ешува шейле табшырды: «Ине, Мен Ерихо галасыны ве онуң эдермен уршуҗылары билен бирликде онуң ханыны сениң элиңе берйәрин.

² Әхли уршуҗыларың билен алты гүнүң довамында, гүнде бир гезек галаның дашындан айлан.

³ Гой, еди руханының херси гочуң шахындан эдилен бир сурнайы алып, Әхт сандыгының өңүнден йөресин. Единҗи гүн сиз галаның дашындан еди гезек айланың, шол вагт руханылар хем сурнайларыны чалсынлар.

⁴ Батлы чалнан сурнайларың сеслерини эшиден бадыңыза, әхлиңиз гаты сесиңиз билен гыгырың, шонда галаның диварлары йыкылар. Шол вагт әхли адамлар галаның ичине күрсәп гирсинлер».

⁵ Ешува руханылары чагырып, олара: «Реббиң Әхт сандыгыны гөтериң, еди саны руханы болса гочуң шахындан эдилен еди сурнайы гөтерип, Реббиң Әхт сандыгының өңүнден йөресин» дийди.

⁶ Соңра ол өз адамларына галаның дашындан айланып башламагы ве өңдәки яраглы гошуна Реббиң Әхт сандыгының өңүнден йөремеклиги буюрды.

⁷ Эдил Ешуваның буйрушы ялы, еди руханы Реббиң хузурында сурнайларыны чалып, өңе йөредилер. Реббиң Әхт сандыгыны гөтерйәнлер хем оларың ызына дүшдүлер.

⁸ Яраглы гошун сурнайларыны чалып барян руханыларың өңүнден гитди ве ызкы гораг гошуны Реббиң Әхт сандыгының ызына дүшди. Тутуш шол вагт сурнай сеслериниң ызы үзүленокды.

⁹ Эмма Ешува өз адамларына: «Өзүм буйрук берйәнчәм, сесиңизи чыкармаң, агзыңыздан бир сөз хем чыкмасын, диңе айдан вагтым гыгырың, диңе шол вагт гыгырың» дийди.

¹⁰ Шейлеликде, Ешува Реббиң Әхт сандыгыны гөтердип, әхли адамлар билен биле галаның дашындан бир гезек айланды. Соңра адамлар ызларына дүшелгә доланып гелдилер ве олар гиҗәни шол ерде гечирдилер.

¹¹ Эртеси гүн Ешува ир билен турды ве руханылар Реббиң Әхт сандыгыны гөтерип уградылар.

¹² Гочуң шахындан эдилен еди сурнайы гөтерип барян еди руханы сурнайларыны дынман чалып, Реббиң Әхт сандыгының өңүнден йөредилер. Яраглы гошун оларың өңүнден барярды. Ызкы гораг гошуны Реббиң Әхт сандыгының ызындан гелйәрди.

¹³ Олар галаның дашындан икинҗи гүн хем бир гезек айландылар ве ызларына дүшелгә доланып гелдилер. Олар шейдип, алты гүн айландылар.

¹⁴ Единҗи гүн олар ирден туруп, өңки йөрән ёллары билен галаның дашындан еди гезек айландылар. Диңе шол гүн олар галаның дашындан еди гезек айландылар.

¹⁵ Единҗи айлавда руханылар сурнайларыны чаланларында, Ешува өз адамларына гыгырмагы буйруп, шейле дийди: «Гыгырың! Чүнки Реб бу галаны сизе берди!

¹⁶ Бу гала ве ондакы әхли затлар Реббе айры гойландыгы үчин бүтинлей ёк эдилмели. Лолучылык билен гүнүни гөрйән Рахапдан ве онуң өйүндәкилерден башга екеҗе адам хем дири галмалы дәлдир, себәби Рахап бизиң иберен ичалыларымызы гизләп саклады.

¹⁷ Бүтинлей ёк эдилмели затлардан дашда дуруң. Гөз гыздырып, ол затлардан екеҗесини алсаңыз-да, сиз Ысрайыл дүшелгесине вейранчылык ве бетбагтчылык гетирерсиңиз.

¹⁸ Алтын-күмүшден, мисден ве демирден ясалан әхли гап-гачлар Реббе багыш эдилендир. Олар Реббиң газнасына гоюлмалыдыр».

¹⁹ Шейдип, адамлар гыгырдылар, руханылар сурнайларыны чалдылар. Гошун сурнайларың сесини эшиден бадына шейле бир улы шовхун турузды велин, галаның диварлары йыкылды. Шол вагт гошун гала тарап окдурылды ве оны басып алды.

²⁰ Шунлукда, олар галадакы хемме эркекдир аяллары, яшу-гаррылары, шейле хем мал-гаралары, гоюнлары, эшеклери гылычдан гечирип бүтинлей ёк этдилер.

²¹ Соңра Ешува Ерихо галасына ве онуң даш-төверегине ичалылык этмәге гиден ики яш йигиде: «Рахабың өйүне барың ве оңа, онуң өйүндәкилерине сөз бершиңиз ялы, олары дашарык алып чыкың» дийди.

²² Ол ики яш йигит Рахабың өйүне гидип, оны, онуң ата-энесини, доганларыны хем-де оңа дегишли болан адамларың хеммесини дашарык алып чыкды. Олар бу машгаланы тутушлыгына гетирип, Ысрайыл дүшелгесиниң янында ерлешдирдилер.

²³ Галаны ве онуң ичиндәки әхли затлары отладылар, диңе алтын-күмүшден, мисден ве демирден ясалан гап-гачлар Реббиң өйүниң газнасына гоюлды.

²⁴ Ерихо галасына ичалы болуп баранлары гизләп сакландыгы үчин, Рахабы ве онуң доган-гарындашларыны Ешува дири галдырды. (Онуң несиллери шу гүнки гүн хем ысрайылларың арасында яшаярлар.)

²⁵ Шол вагт Ешува касам эдип, шейле дийди: «Ким бу Ерихо галасыны тәзеден гурса, гой, оңа Реббиң хузурында нәлет сиңсин! Онуң дүйбүни тутан новбахар оглуны йитирер, дервезесини дикен көрпе оглундан дынар!»

²⁶ Шейлеликде, Реб Ешува билен биле болды. Ешуваның шөхраты тутуш юрда яйрады.