Ýeşuwa 4 - Мукаддес Китап

4‑нҗи бап Ядыгәрлик дашлары гоюляр

¹ Тутуш халк Иордан дерясындан гечип боландан соң, Реб Ешува:

² «Халкың арасындан он ики саны адам, ягны хер тиреден бир адам сайла.

³ Олара Иордан дерясының ортасындан, эдил руханыларың аягының дуран еринден он ики саны дашы гетирмеги буюр. Олар шол дашлары сизиң гиҗе дүшлеҗек дүшелгәңизе гетирип гойсунлар» дийди.

⁴ Соңра Ешува хер тиреден сайланан он ики адамы чагырды.

⁵ Ешува олара шейле дийди: «Өз Худайыңыз Реббиң Әхт сандыгының өңүнден йөрәп, Иордан дерясының ортасына тарап гидиң. Ысрайыл халкының тире санына гөрә, хер бириңиз эгниңизе бир дашы гөтерип гетириң.

⁶ Бу дашлар сизиң үчин ядыгәрлик болсун. Гелҗекде чагаларыңыз сизден бу дашларың нәмәни аңладяндыгыны соранларында, булар сизе субутнама болар.

⁷ Ысрайыллар үчин Реббиң Әхт сандыгының өңүнде Иордан дерясының сувуның кесилендигини, Әхт сандыгы гөтерилип гетириленде, сувларың ыза чекилендигини олара гүррүң бериң. Шейлеликде, бу дашлар ысрайыллар үчин асырлар бойы субутнама болар».

⁸ Ысрайыллар Ешуваның табшырышы ялы этдилер. Олар Реббиң Ешува буйрушы ялы, Ысрайылың хер тиреси үчин бир дашы – он ики саны дашы Иордан дерясының ортасындан дүшелгә гетирип, олары шол ерде гойдулар.

⁹ Ешува хем башга он ики саны дашы Иордан дерясының ортасында, Реббиң Әхт сандыгыны гөтерйән руханыларың дуран еринде гойды. (Ол дашлар бизиң гүнлеримизде хем шол ерде дур.)

¹⁰ Ысрайыллара берҗай этмели дийип, Реббиң Ешува берен хемме буйруклары ерине етйәнчә, Реббиң Әхт сандыгыны гөтерйән руханылар Иордан дерясының ортасында дурдулар. Бу Мусаның Ешува дийши ялы болды. Ысрайыллар дерядан чалтлык билен гечдилер.

¹¹ Оларың хеммеси гечип боландан соңра Реббиң Әхт сандыгыны гөтерйән руханылар гечдилер ве олар халка баш болуп, адамларың өңүнден йөредилер.

¹² Рубенлер, гатлар ве гүндогардакы манаша тиреси Мусаның айдышы ялы, ярагланып ысрайылларың өңүнден гечдилер.

¹³ Гүйчли уршуҗыларың кырк мүңе голайы Реббиң хузурында сөвеше тайяр болуп, Ерихо дүзлүгине гелдилер.

¹⁴ Шол гүн Реб әхли ысрайылларың гөзүниң алнында Ешуваны бейгелтди. Олар Мусадан горкушлары ялы, өмрүниң бүтин довамында Ешувадан хем горкдулар.

^15-16 Реб Ешува: «Әхт сандыгыны гөтерйән руханылара: „Иордандан чыкың“ дийип буйрук бер» дийди.

¹⁷ Ешува хем буйругы ерине етирди.

¹⁸ Реббиң Әхт сандыгыны гөтерйән руханылар сувдан чыкып, аяклары гуры ере деген бадына, Иорданың сувы ене-де өз ханасына өврүлип, өңкүси ялы долуп-дашып акып башлады.

¹⁹ Ысрайыллар Иордандан биринҗи айың онунҗы гүни чыкдылар ве Ерихо галасының гүндогар тарапындакы Гилгалда дүшледилер.

²⁰ Ешува оларың Иордандан алан он ики саны дашыны Гилгалда гойдурды.

²¹ Ол ысрайыллара шейле дийди: «Гелҗекде сизиң несиллериңиз өз аталарындан бу дашларың нәмәни аңладяндыгыны соранларында,

²² сиз олара ысрайыл халкының Иордан дерясының ичинден гуры ер билен гечендигини дүшүндириң.

²³ Чүнки Гызыл деңизден геченимизде, Худайыңыз Реббиң бизиң үчин онуң сувуны гурадышы ялы, сиз гечйәнчәңиз Иорданың сувуны-да гурадандыгыны олара айдың.

²⁴ Ол муны ер йүзүндәки әхли халклар Реббиң бейик гудратыны билсин дийип этди. Шейле-де Ол муны Худайыңыз Ребден хемише горкмагыңыз үчин этди».