Ýeşuwa 21 - Мукаддес Китап

21‑нҗи бап Левилере берлен галалар

¹ Леви тиресиниң ёлбашчылары Элгазар руханының, Нунуң оглы Ешуваның ве әхли Ысрайыл тирелериниң уругбашыларының янына гелдилер.

² Левилер Кенган юрдуның Шило галасына гелип, олара: «Реб бизе яшамак үчин галалар ве ири шахлы малларымыз үчин өри мейданлар бермеги Муса аркалы буйрупды» дийдилер.

³ Шейлеликде, Реббиң буйругы боюнча ысрайыллар левилере өз мүлк ерлеринден шу ашакдакы галалары ве өри мейданларыны бердилер.

⁴ Илкинҗи кохат уругының биҗеси чыкды. Левилерден болан Харун руханының несиллерине биҗе боюнча яхуда, шимгон ве бенямин тирелеринден сайланып, он үч гала берилди.

⁵ Бейлеки галан кохат уругына биҗе боюнча эфрайым, дан тирелеринден ве гүнбатардакы манаша тиресинден он гала берилди.

⁶ Гершон уругы хем биҗе атышыкда ысакар, ашер, нафталы тирелеринден ве Башандакы манаша тиресинден өзлерине он үч гала алдылар.

⁷ Мерары уругы өзлерине рубен, гат ве зебулун тирелеринден он ики гала алдылар.

⁸ Шейлеликде, ысрайыллар Реббиң Мусаның үсти билен буйрушы ялы, бу галалары өри мейданлары билен бирликде левилере биҗе боюнча пайлап бердилер.

^9-10 Ысрайыллар левилерден болан кохат уругындан Харуның несиллерине яхуда ве шимгон тирелериниң хайсы галаларыны бермелидигини кесгитледилер, себәби оларың биҗеси биринҗи чыкыпды.

¹¹ Ысрайыллар олара Кирятарбаны (Арба Анагың какасыды) берипдирлер. Бу Яхуда даглыгындакы Хеброн галасы болупдыр, онуң даш-төверегини өри мейдан тутяр.

¹² Эмма галаның якынындакы ачык мейданларыны ве онуң обаларыны болса Епунне оглы Калеп мүлк ер хөкмүнде алыпды.

¹³ Харун руханының несиллерине ганхорлар үчин гачыбаталга болан Хеброн галасыны ве Либнаны,

¹⁴ Ятыры, Эштемованы,

¹⁵ Холоны, Дебири,

¹⁶ Айыны, Ютаны, Бейтшемеши, оларың хер бириниң өри мейданлары билен биле бу ики тиреден җеми докуз гала бердилер.

¹⁷ Олар бенямин тиресинден хем шу галалары алдылар: Гибгоны, Гебаны,

¹⁸ Анатоды ве Алмоны, оларың херсиниң өри мейданлары билен биле җеми дөрт гала.

¹⁹ Шу саналан он үч гала өри мейданлары билен биле Харун руханының несиллерине берилди.

²⁰ Левилериң кохат неслиниң галан бөлеги биҗе боюнча эфрайым тиресинден галалар алдылар.

²¹ Олар ганхорлар үчин гачыбаталга болан, Эфрайым даглыгындакы Шекем галасыны, шейле хем Гезери,

²² Кибсайымы, Бейтхороны өри мейданлары билен биле олара бердилер. Булар җеми дөрт галадыр.

²³ Олар дан тиресинден Элтеке, Гибетон,

²⁴ Аялон ве Гатриммон галаларыны өри мейданлары билен биле алдылар. Булар җеми дөрт галадыр.

²⁵ Олара гүнбатардакы манаша тиресинден шу галалары: Тагнагы, Гатриммоны – җеми ики галаны өри мейданлары билен биле бердилер.

²⁶ Шу ёкарда саналан он гала, өри мейданлары билен бирликде кохат несиллериниң галан бөлегине берилди.

²⁷ Левилериң гершон уругына гүндогардакы манаша тиресинден ганхорлар үчин гачыбаталга болан Башандакы Голан галасы ве Беештераг – җеми ики гала, оларың өри мейданлары билен биле берилди.

²⁸ Ысакар тиресинден болса олара Кишён, Даберат,

²⁹ Ярмут, Эйнганным галаларыны – җеми дөрт галаны оларың өри мейданлары билен биле алдылар.

³⁰ Ашер тиресинден олара Мишал, Абдон,

³¹ Хелкат ве Рехоп галалары – җеми дөрт гала херсиниң өри мейданлары билен биле берилди.

³² Олара нафталы тиресинден ганхорлар үчин гачыбаталга болан, Җелиледәки Кедеш галасы, шейле хем Хаммотдор, Картан галалары – җеми үч гала өри мейданлары билен биле берилди.

³³ Шу саналан он үч гала, оларың өри мейданлары билен бирликде гершон уругына берилди.

³⁴ Левилериң галан мерары уругына болса зебулун тиресинден галалар берилди. Олара Ёкнегам, Корта,

³⁵ Риммон, Нахалал галалары – җеми дөрт гала херсиниң өри мейданлары билен биле берилди.

³⁶ Рубен тиресинден олара Бесер, Яхса,

³⁷ Кедемот, Мейпагат галалары – җеми дөрт гала херсиниң өри мейданлары билен биле берилди.

³⁸ Гат тиресинден олара ганхорлара гачыбаталга эдилип белленен Гилгатдакы Рамот галасы ве Маханайым,

³⁹ Хешбон, Язер галалары өри мейданлары билен биле берилди. Булар җеми дөрт галадыр.

⁴⁰ Шейлеликде, левилериң галан мерары уругының пайына биҗе боюнча җеми он ики гала дүшди.

⁴¹ Ысрайыллардан левилере мүлк хөкмүнде берлен галаларың җеми өри мейданлары билен бирликде кырк секиз болды.

⁴² Шол галаларың хер бириниң даш-төверегини өри мейдан гуршап алярды. Өри мейдансыз екеҗе-де гала ёкды.

⁴³ Ине, Реб ысрайылларың ата-бабаларына ант ичип сөз берен ериниң әхлисини олара берди. Олар бу ерлери эеләп, ол ерде яшадылар.

⁴⁴ Реб оларың ата-бабаларына сөз берши ялы, олара әхли тарапдан парахатчылык берди. Оларың душманларының екеҗеси хем оларың өңүнде дуруп билмеди. Реб оларың душманларыны өз эллерине берди.

⁴⁵ Реббиң Ысрайыл несиллерине берен аҗайып вадаларындан екеҗе сөзи хем ерине етмән галмады. Оларың әхлиси хакыкат йүзүнде берҗай болды.