Ýeşuwa 12 - Мукаддес Китап

12‑нҗи бап Мусаның басып алан ханлары

¹ Ине, ысрайылларың еңип алан ерлериниң ханлары шулардыр. Ысрайыллар Иордан дерясының аңырсындакы гүндогар тарапа узалып гидйән Арнон җүлгесинден Хермон дагына ченли болан ерлери ве тутуш Араба дүзлүгиниң гүндогар тарапыны басып алдылар.

² Ханларың бири Хешбонда яшан амор ханы Сихонды. Онуң ханлыгы Гилгадың ярысы ве Арнон җүлгесиниң якасындакы Арогерден башлап, шол җүлгәниң ортасындакы галадан тә аммонларың арачәги болан Ябок дерясына ченли аралыгы өз ичине алярды.

³ Шейле хем, ол Киннерет көлүнден Араба деңзине, ягны Өли деңзе ченли болан ерлере, Араба дүзлүгиниң гүндогарында Бейтешимода ченли барян ерлере ве гүнбатарда Писга дагының этегиндәки ерлере эелик эдйәрди.

⁴ Бейлеки хан Башан ханы Огды. Ол Аштаротда ве Эдрейде яшап, рапаларың иң соңкуларының бириди.

⁵ Онуң ханлыгына Хермон дагы, Салка, бүтин Башандан Гешурың ве Магакадың арачәклерине ченли, Гилгадың ярысы, хешбон ханы Сихоның мейданының арачәгине ченли ерлер гирйәр.

⁶ Реббиң гулы Муса ве ысрайыллар оларың хеммесини басып алдылар. Муса оларың әхли ерлерини рубенлериң, гатларың ве гүндогардакы манаша тиресиниң эечилигине берди.

Ешуваның басып алан ханлары

⁷ Ешува ве ысрайыллар Иордан дерясының гүнбатарындакы әхли ханлары, Ливан җүлгесиндәки Багалгатдан Сегир билен янашык Халак дагына ченли ерлери басып алдылар. Ешува ол ерлери бөлүп, ысрайылларың тирелери боюнча мүлк эдип пайлап берди.

⁸ Даглыкда, байырлыкда, Араба дүзлүгинде, даг этеклеринде, чөллүкде ве Негеп чөлүнде яшаян хетлериң, аморларың, кенганларың, перизлериң, хивилериң ве ябусларың ерлерини ысрайыллара мүлк эдип берди.

⁹ Ине, Ешува ве ысрайыллар шу галаларың ханларыны: Ерихоның, Бейтелиң голайындакы Айың,

¹⁰ Иерусалимиң, Хеброның,

¹¹ Ярмудың, Лакышың,

¹² Эглоның, Гезериң,

¹³ Дебириң, Гедериң,

¹⁴ Хорманың, Арадың,

¹⁵ Либнаның, Адулламың,

¹⁶ Македаның, Бейтелиң,

¹⁷ Тапуваның, Хепериң,

¹⁸ Апегиң, Лашароның,

¹⁹ Мадоның, Хасорың,

²⁰ Шимронмероның, Акшабың,

²¹ Тагнагың, Мегидоның,

²² Кедешиң, Кармелдәки Ёкнегамың,

²³ Напотдорың янындакы Доруң, Җелиледәки Гойымың ве

²⁴ Тирсаның – җеми отуз бир ханы басып алдылар.