Ýermeýa 9 - Мукаддес Китап

9-нҗы бап

¹ Вах, кәшге башым бир булак, гөзлерим гөзяш чешмеси болсады! Бичәре халкымың өлдүриленлери үчин агласадым мен гиҗе-гүндиз!

² Кәшге халкымы ташлап, олардан узакда боларым ялы чөлде бир кервенсарай тапсадым! Чүнки оларың хеммеси зынахор, биртопар хайын.

³ «Ялан үчин диллерини яй кимин эгрелдйәрлер. Юртда оларың гүйҗи нәдогрулык билен гүйчленйәр, чүнки пислик үстүне пислик эдйәрлер, Мени асла танамаярлар». Муны Реб айдяндыр.

⁴ Хер кес өз достундан әгә болсун, хич бир догана ынам этмәң. Чүнки хер бир доган яланчыдыр, хер бир дост ялан геп гездирйәр.

⁵ Хер ким өз достуны алдаяр, хич ким хакыкаты сөзлемейәр. Диллерине ялан сөзлемеги өвретдилер, шер ишлер эдип, тоба этмеги билмедилер.

⁶ Зулум үстүне зулум, ялан үстүне ялан ягяр! Олар Мени танамакдан йүз өвүрйәрлер. Муны Реб айдяндыр.

⁷ Мунуң үчин Хөкмүрован Реб шейле диййәр: «Мен олары эредип, сынагдан гечирерин. Бичәре халкымы башга нәме эдип билерин?

⁸ Диллери өлдүриҗи пейкамдыр, хиле билен сөзлейәрлер. Гоңшуларына хош сөзлер айдярлар, йүрегинде болса дузак гурярлар.

⁹ Бу затлар үчин Мен олары, хей-де, җезаландырмарынмы? Бейле миллетден өч алмарынмы?» Муны Реб айдяндыр.

¹⁰ Мен даглар үчин аглаярын, ахы-нала чекйәрин, чөлүң өрүлери үчин яс тутярын, себәби олар харабалыга өврүлди, ол ерден гечйән ёк. Мал-гараларың сеси эшидилмейәр, гушлар-да, хайванлар-да гачып гитдилер.

¹¹ Мен Иерусалими вейран эдип, шагаллар сүренине өврерин. Яхуда шәхерлерини илатсыз гоюп, харабачылыга өврерин.

¹² Муңа дүшүнер ялы пайхаслы бири бармыдыр? Муны ыглан эдер ялы Реббиң сөзлән кишиси ким? Нәме үчин юрт вейран болуп, ичинден хич ким гечмез ялы, чөл кимин бошап ятыр?

¹³ Реб шейле диййәр: «Олар өзлерине берен канунымы рет этдилер, сөзүме гулак асмадылар, ол боюнча херекет этмедилер.

¹⁴ Гайтам, кесирлик билен ниетлерини ямана дүвүп, ата-бабаларының өвредиши ялы, Багал бутуның ызына эердилер».

¹⁵ Шонуң үчин хем Ысрайыл Худайы Хөкмүрован Реб шейле диййәр: «Мен бу халка аҗы ёвшан ийдирерин, зәхерли сув ичирерин.

¹⁶ Мен олары өзлериниң хем, ата-бабаларының хем танамадык миллетиниң арасына пытрадарын. Олары ёк эдйәнчәм, ызларына гылыч саларын».

Халк җезасы үчин яс тутяр

¹⁷ Хөкмүрован Реб шейле диййәр: «Ягшы ойланып гөрүң, агычы аяллары чагырың, гелсинлер. Иң эзберлерини чагырдың, гелсинлер.

¹⁸ Деррев гелип, бизиң үчин агы айтсынлар. Гой, гөзлеримизиң яшы кепемесин, габакларымыздан сил болуп аксын».

¹⁹ Ине, Сиондан перят эшидилйәр: «Бизи, гөр, нәхили вейран этдилер! Гаты утанҗа галдык, чүнки юрдумызы терк этдик, өйлеримиз ер билен егсан болды».

²⁰ Эй, аяллар, Реббиң сөзүни эшидиң, агзындан чыкян сөзе гулак асың. Гызларыңыза яс тутмагы, гоңшыңыза агы айтмагы өвредиң.

²¹ Көчелерден чагалары, мейданчалардан яш йигитлери гырып ташламак үчин, өлүм пенҗирелеримизе дырмашып, галаларымыза гирди.

²² Реб шейле айдяр дий: «Ынсан җесетлери экин мейданына сепилен дерс дей, оракчының ызындакы десселер дей топрага серлер. Олары хич ким йыгнамаз».

²³ Реб шейле диййәр: «Пайхаслы пайхасына, гүйчли гүйҗүне магтанмасын, бай байлыгына өвүнмесин.

²⁴ Өвүнйән диңе Маңа дүшүнйәнлиги ве танаянлыгы билен өвүнсин, ер йүзүнде садык сөйги, адалат ве догручыллык билен херекет эдйән Мен – Ребдирин. Чүнки Мен булардан леззет алярын. Муны Реб айдяндыр.

²⁵ Шейле гүнлер гелер, тени сүннетли болуп-да, йүреги сүннетсиз адамлары җезаландырарын. Муны Реб айдяндыр.

²⁶ Мүсүри, Яхуданы, Эдомы, аммонлары, Мовабы ве чөлде яшаян гырчув сакгаллыларың хеммесини җезаландырарын. Чүнки бу миллетлериң әхлиси сүннетсиз, тутуш ысрайыл халкының йүреги-де сүннетсиз».