Ýermeýa 8 - Мукаддес Китап

8‑нҗи бап

¹ «Шол вагт Яхуда патышаларының, ёлбашчыларының, руханыларының, пыгамберлериниң сүңклери, Иерусалимиң илатының сүңклери габырларындан чыкарылар. Муны Реб айдяндыр.

² Бу сүңклер оларың өз сөен, гуллук эден, ызларына эерен, маслахат сорап сежде эден затларының, ягны Гүнүң, Айың, тутуш асман җисимлериниң астына серлер. Олар йыгналып җайланылмаз, топрагың йүзүнде дерс ялы ятар.

³ Бу пис ковумдан аман галанларың хеммеси даргадан ерлеримде яшайшы дәл-де, өлүми сайлар». Муны Хөкмүрован Реб айдяндыр.

Халкда утанч ёк

⁴ Сен олара Реб шейле диййәр дий: «Йыкылан ынсан галмазмы гайдып? Ёлундан азашанлар гелмезми ёла?

⁵ Нәме үчин бу халк ёлдан чыкды? Иерусалим дынгысыз дөнүклик эдйәр. Олар ялана берк япышып, ыза доланмакдан боюн товлаяр.

⁶ Мен үнс берип диңледим, догрусыны айтмаяр олар. Хиҗиси: „Бу эденим нәме?“ дийип, өз пислигине тоба этмейәр. Сөвешде чапян ат кимин херси өз ёлуна ёртяр.

⁷ Хатда леглек хем өз мөвсүмини билйәр. Гумры, гарлавач, дурна-да гөчмели пурсадыны билйәр. Эмма халкым Мен-Реббиң парзларыны билмейәр.

⁸ Нәдип сиз муны айдып билйәңиз: „Биз акыллы, Реббиң кануны биздедир“? Хакыкатда, бу кануны ялана өврен хилегәр канунчыларың галамыдыр.

⁹ Акылдарлар утанҗа галдылар, ховп ичинде дузага дүшдүлер. Олар Реббиң сөзүни рет этдилер. Оларда нәме пәхим бар?

¹⁰ Улудан-кичә әхлиси харам газанҗың ышкында, пыгамберден рухана ченли хер кес хиле билен гүн гөрйәр. Шонуң үчин аялларыны башгалара, меллеклерини талаңчылара берерин.

¹¹ Саг-саламатлык болмаса хем „саг-саламатлык, саг-саламатлык“ дийип, халкымың ярасыны йүзлей беҗердилер.

¹² Неҗис ишлери эденлеринде утандылармы? Ёк, асла утанмадылар. Йүз гызарманың нәмедигини хем билмедилер. Шонуң үчин хем олар-да хеләк болуп, йыкыланларың арасына йыкыларлар, җезаландыранымда ер билен егсан боларлар. Муны Реб айдяндыр.

¹³ Олаң хасылыны вес-вейран эдерин, үзүм шахалары-да, инҗир агаҗы-да миве бермез, хатда япраклары-да гурар. Олара нәме берен болсам, эллеринден алнар». Муны Реб айдяндыр.

¹⁴ Нәме үчин биз энтек хем бу ерде отырыс? Гелиң, үйшүп, берк галалара чозалың-да, ол ерде хеләк болалың. Реббе гаршы гүнә эдендигимиз үчин, Худайымыз Реб зәхерли сув берип, бизи өлүме сезевар этди.

¹⁵ Саг-саламатлыга гарашдык, эмма хич говулык ёк. Шыпа пурсадына гарашдык, эмма оңа дерек ховп абанды.

¹⁶ Душман атларының хоррулдысы Дандан эшидилйәр, бедевлериниң кишңемесинден тутуш ер йүзи титрейәр. Олар бу юрды, онуң ичиндәки әхли затлары, шәхери хем онда яшаянлары ёк этмәге гелдилер.

¹⁷ «Ине, Мен үстүңизе зәхерли йыланлары, алахөвренлери иберерин, олар сизи чакарлар». Муны Реб айдяндыр.

Пыгамбер халк үчин яс тутяр

¹⁸ Дердиме шыпа ёкдур, йүрегим яралыдыр мениң.

¹⁹ Ине, эзиз халкымың перяды ериң аңры уҗундан эшидилйәр: «Реб Сионда дәлмидир? Онуң Патышасы ол ерде дәлми?» «Нәме үчин олар өзлериниң йигренҗи затлары, өзге неҗисликлери билен гахарымы гетирдилер?»

²⁰ Халк: «Орак дөври өтди, томус гутарды, эмма биз халас болмадык» диййәр.

²¹ Бичәре халкымың ярасындан өтри мен-де яралы, яс тутярын, үстүме ховп абанды.

²² Гилгатда мелхем ёкмудыр? Ол ерде тебип ёкмудыр? Онда нәме үчин бичәре халкымың ярасына эм эдилмейәр?