Ýermeýa 6 - Мукаддес Китап

6-нҗы бап Душманлар Иерусалими габаярлар

¹ «Эй, бенямин халкы, җаныңызы халас этмек үчин Иерусалимден гачың! Тековада сурнай чалың, Бейтхакеремде бир нышан дикиң, чүнки демиргазыкдан бир бетбагтлык, әпет вейранчылык етип гелйәр.

² Сион гызы – овадан хем нәзик гызы хеләк эдерин.

³ Чопанлар сүрүлери билен онуң янына гелерлер. Чадырларыны онуң даш-төверегинде дикип, хер ким өзүниң өри мейданында отлар.

⁴ Иерусалиме гаршы сөвешмәге тайярланың. Туруң, гүндизиң гүни чозалың! Ишимиз гайтды! Гүн яшып баряр, өйлән көлегелер узаляр!

⁵ Туруң, гиҗе чозалың, галаларыны вейран эделиң!»

⁶ Мунуң үчин Хөкмүрован Реб шейле диййәр: «Иерусалимиң агачларыны кесиң, диварына чыкмак үчин япгыт гуруң. Бу шәхер җезаландырылмалыдыр, мунуң ичинде зулумдан башга зат ёкдур.

⁷ Чешмеден сув нәхили җошян болса, бу шәхерден-де пислик шейле җошяндыр. Ичинде эшидилйәр зорлук хем зулум, хассалык хем яралар бар гөрйәним.

⁸ Эй, Иерусалим, акылыңа айлан, ёгсам Мен сенден йүз өврерин. Сени харабачылыга, илатсыз бир юрда өврерин».

⁹ Хөкмүрован Реб шейле диййәр: «Үзүмиң соңкы салкымының йыгналышы ялы, Ысрайылың аман галанлары хем соңкусына ченли йыгналар. Шонуң үчин үзүм йыгянчы дей элиңи соңкы гезек шаха узат».

¹⁰ «Олар эшидер ялы мен киме айдайын, киме дуйдурыш берейин? Середиң, оларың гулаклары гапык, эшитмейәрлер. Олар Реббиң сөзүнден хошал болмаярлар, гайтам, оны яңсылаярлар.

¹¹ Мунуң үчин мен Реббиң газабындан долудырын, гахарымы сакламакдан халыс ирдим». «Оны көчедәки чагаларың, топланан йигитлериң үстүне дөк. Әр-аялың икисини-де тутуп әкидерлер, гаррыдыр гоҗа-да олардан сыпмаз.

¹² Олар өйлеридир меллеклери билен аяллары берлер башгалара, Мен элими галдырарын бу юрдуң илатына». Муны Реб айдяндыр.

¹³ «Улудан-кичә әхлиси харам газанҗың ышкында, пыгамберден рухана ченли хер кес гүн гөрйәр хиле билен.

¹⁴ Саг-саламатлык болмаса хем „саг-саламатлык, саг-саламатлык“ дийип, халкымың ярасыны йүзлей беҗердилер.

¹⁵ Олар өзлерини бихая алып барып, неҗис ишлер этдилер, эмма муңа утанмадылар. Утанып гызармагың нәмедигини билмедилер. Шонуң үчин олар-да хеләк болуп, йыкыланларың арасына йыкыларлар, җезаландыранымда, ер билен егсан боларлар». Муны Реб айдяндыр.

¹⁶ Реб шейле диййәр: «Ёлуң чатрыгында дуруп середиң, овалкы ёдалар хакда сорап, ягшы ёлуң ниредедигини өврениң; ондан йөрәң, җаныңыз рахатлык тапар. Эмма олар: „Ол ёлдан йөремерис“ дийдилер.

¹⁷ Мен сизиң үстүңизден гөзегчи гоюп: „Сурнайың сесине гулак асың!“ дийдим. Эмма олар: „Гулак асмарыс“ дийдилер.

¹⁸ Шонуң үчин хем, эй, миллетлер гулак гоюң. Оларың башындан нәме инҗегини, эй, шаятлар билиң.

¹⁹ Диңле, эй, ер йүзи. Бу халкың башындан бетбагтлык индерерин. Бу оларың эден ниетлериниң мивеси болар, себәби Мениң сөзлериме гулак асмадылар, таглыматымы болса рет этдилер.

²⁰ Нәме үчин Маңа Шебадан якымлы ыслы түтетги, узак юртдан хошбой ыслы гамыш гетирилйәр? Якма гурбанлыкларыңызы кабул этмерин, садакаларыңыз-да турмаяр гөвнүмден».

²¹ Шонуң үчин хем Мен-Реб шейле диййәрин: «Ине, Мен бу халкың өңүне бүдреме дашыны гоярын, ата-энелер чагалары билен бүдрәп йыкылар, гоңшусы досты билен бирликде хеләк болар».

²² Реб шейле диййәр: «Ине, демиргазык юртдан бир халк гелйәр, ериң уҗундан бир бейик миллет аяга галяр.

²³ Олар яйдыр найза билен ярагланан, өзлери-де рехимсиз хем залымдырлар. Сеслери деңиз ялы гүввүлдейәр. Эй, Сион гызы! Олар атлара атланып, бир адам ялы сөвеше тайярланып, сениң гаршыңа нызама дурдулар».

²⁴ «Олар хакдакы хабары эшиденимизде, эллеримизиң ысгыны гачды. Догурян аял кимин чекйәрис дерт-азаплары.

²⁵ Дашары чыкмаң, ёлдан йөремәң, чүнки душманың элинде гылыч бар, әхли тарапдан ховп абаняр.

²⁶ Эй, Мениң эзиз халкым! Җул гейнип, күл үстүнде отур. Ялңыз чагаң үчин яс тутян дек аҗы гөзяш дөк, чүнки үстүмизе дуйдансыз хеләклейҗи гелер».

²⁷ «Мен сени халкымың арасында барлагчы хем дерңевчи гойдум, эден ишлерини барларсың, дерңәрсиң.

²⁸ Оларың бары текепбир питнечидирлер, гыбатдыр төхмет билен яшаярлар. Йүреги бүрүнч, демир дей гатап, хеммеси ёлдан чыкандыр.

²⁹ Көрүк гыздырыляр, отда гуршун эрейәр, эмма зергәриң бу эден иши пучдур, шонда-да пислик хич айрылмаяр.

³⁰ Олара „ялан күмүш“ дийлер, чүнки Реб олары рет этди».