Ýermeýa 52 - Мукаддес Китап

52‑нҗи бап Иерусалимиң сынмагы

¹ Сидкия патыша боланда, йигрими бир яшындады. Ол Иерусалимде он бир йыл патышалык этди. Онуң эҗеси Хамутал либналы Ермеяның гызыды.

² Сидкия хем Ехоякым ялы Реббиң назарында йигренҗи ишлери этди.

³ Реббиң Иерусалиме ве яхуда халкына гаршы болан гахары туташярды. Ол шонуң үчин олары Өз хузурындан ковды. Сидкия Бабыл патышасына гаршы уруш турузды.

⁴ Сидкияның патышалыгының докузынҗы йылының онунҗы айының онуна Бабыл патышасы Небукаднесар тутуш гошуны билен Иерусалиме хүҗүм эдип, онуң гаршысында дүшелге гурды. Олар Иерусалиме гирмек үчин, даш-төверегинде япгыт гурдулар.

⁵ Шейдип, Сидкияның патышалыгының он биринҗи йылына ченли Иерусалим габавда дурды.

⁶ Дөрдүнҗи айың докузына шәхерде ачлык гүйҗәп, юрдуң илаты иймәге чөрек тапмады.

⁷ Галаның диварының бир бөлеги душман тарапындан йыкылды. Бабыллылар галаның даш-төверегини габасалар-да, әхли эсгерлер гиҗе патышаның багының ёлундан, ики диварың арасындакы дервезеден чыкып, Араба дүзлүгине тарап гачып гитдилер.

⁸ Эмма бабыллыларың гошуны патышаның ызындан ковуп, Ерихо дүзлүгинде ызындан етди. Патышаның әхли гошуны онуң янындан гачып, дагашып гитдилер.

⁹ Онсоң бабыллылар патышаны тутуп, Хамат юрдундакы Рибла гетирдилер. Шол ерде Бабыл патышасы оңа хөкүм чыкарды.

¹⁰ Бабыл патышасы Сидкияның огулларыны онуң гөзүниң алнында өлдүрди. Риблада Яхуданың әхли ёлбашчыларыны-да өлдүрди.

¹¹ Ол Сидкияның гөзлерини ойдурды ве зынҗыр билен баглап, Бабыла алып гитди. Ол оны өлйәнчә зынданда саклады.

¹² Бабыл патышасы Небукаднесарың патышалыгының он докузынҗы йылының бәшинҗи айының онуна шаның җанпеналарының баштутаны хем эмелдары Небузарадон Иерусалиме гелди.

¹³ Небузарадон Реббиң өйүни, патышаның көшгүни ве Иерусалимиң әхли җайларыны ода берди, ол улы җайларың әхлисини якды.

¹⁴ Бабыллыларың җанпеналарының баштутаны билен гелен гошун Иерусалимиң даш-төверегиндәки диварларың әхлисини йыкды.

¹⁵ Җанпеналарың баштутаны Небузарадон халкың гарыпларыны, шәхерде аман галанлары, Бабыл патышасының тарапына гечен гачгаклары ве аман галан сенеткәрлери есир эдип әкитди.

¹⁶ Эмма җанпеналарың баштутаны Небузарадон юрдуң гарып-гасарларының кәбирлерини үзүмчилик ве дайханчылык билен мешгуллансынлар дийип гоюп гайтды.

¹⁷ Бабыллылар Реббиң өйүндәки бүрүнч сүтүнлери, шейле хем ол ердәки арабалары ве бүрүнч ховзы парчалап, әхли бүрүнҗи Бабыла алып гитдилер.

¹⁸ Олар ыбадатхана хызматы үчин уланылян газанлары, пилчелери, әтишгирлери, легенлери, якымлы ыслы түтетги якмак үчин уланылян гаплары ве бейлеки бүрүнч гап-гачларың барыны алып гитдилер.

¹⁹ Җанпеналарың баштутаны булардан башга-да окаралары, маңңаллары, легенлери, газанлары, чыраданлары, гаплары, кәселери алып гитди. Ол алтындан ясалан затлары алтыны үчин, күмүшден ясалан затлары хем күмши үчин алып гитди.

²⁰ Сүлейман патышаның Реббиң өйи үчин ясан ики сүтүни, бир ховзы ве ховзуң ашагындакы он ики саны бүрүнч өкүзи үчин сарп эдилен бүрүнҗиң аграмы чәксизди.

²¹ Бир сүтүниң бейиклиги он секиз тирсекди. Төверегиниң айлавы он ики тирсекди. Галыңлыгы дөрт бармак болуп, ичи бошды.

²² Сүтүниң депесинде-де бир саны бүрүнч тәч барды. Бир тәҗиң бейиклиги бәш тирсекди ве тәҗиң даш-төверегине айланан нарлардыр өрме зынҗырлар хем тутуш бүрүнчден ясаланды. Бейлеки икинҗи сүтүн-де нарлар билен безелип, эдил биринҗә меңзешди.

²³ Хер хатарың төверегинде җеми йүз нар барды ве ерден диңе тогсан алтысы гөрнүп дурды.

Яхуда халкы Бабыла сүргүн эдилйәр

²⁴ Баш руханы Серая билен икинҗи руханы Сепаняны хем-де үч саны гапы сакчысыны җанпеналарың баштутаны Бабыла есир эдип әкитди.

²⁵ Ол шәхерде галан эсгерлериң баштутаны эдип белленен бир харбы серкердәни, шәхерден тапылан патышаның еди саны маслахатчысыны, юрдуң илатыны гошуна язян серкердәниң мүрзесини ве юрдуң илатының алтмыш саны баштутаныны алып гитди.

²⁶ Җанпеналарың баштутаны Небузарадон олары тутуп, Рибла галасындакы Бабыл патышасының янына гетирди.

²⁷ Хамат юрдуның Рибла галасында Бабыл патышасы олары өлдүрди. Шейдип, яхуда халкы өз юрдундан сүргүн эдилди.

²⁸ Небукаднесарың есир эдип гетирен халкы, ине, шулардан ыбарат: патышалыгының единҗи йылында үч мүң йигрими үч яхуданы;

²⁹ Небукаднесарың патышалыгының он секизинҗи йылында Иерусалимден секиз йүз отуз ики адамы;

³⁰ йигрими үчүнҗи йылында җанпеналарың баштутаны Небузарадон яхудалардан еди йүз кырк бәш адамы есир эдип әкитди. Олар җеми дөрт мүң алты йүз адамдыр.

Ехоякының есирликден бошадылмагы

³¹ Яхуда патышасы Ехоякының сүргүнлигиниң отуз единҗи йылында Эвилмеродак Бабыла патыша болды. Ол шол йылың он икинҗи айының йигрими бәшинде Яхуда патышасы Ехоякына ягшылык эдип, оны туссаглыкдан бошатды.

³² Ол Ехоякын билен мәхирли сөхбет этди ве оны Бабыла сүргүн эдилен бейлеки шалардан илери тутды.

³³ Шейдип, Ехоякын туссаглыкдакы гейимлерини чыкарды. Ол галан өмрүниң әхли гүнлеринде патышаның сачагындан нахарланды.

³⁴ Онуң гүнделик экленҗи тә өлйәнчә Бабыл патышасы тарапындан берилди.