Ýermeýa 50 - Мукаддес Китап

50‑нҗи бап Бабыл хакындакы пыгамберлик

¹ Бабыл хакда, бабыллыларың юрды хакда Реббиң Ермея пыгамбериң үсти билен айдан сөзи:

² «Миллетлер арасында ыглан эдиң, олара эшитдириң, бир байдак дикиң. Хич зады гизлемән, шуны җар эдиң: „Бабыл басылып алынды, Бел худайы утанҗа галды, Меродак худайы бөлек-бөлек эдилди. Онуң хейкеллери масгара болды, неҗис бутлары парчаланды“.

³ Чүнки демиргазыкдан бир миллет оңа гаршы чыкар, ол онуң юрдуны харабачылыга өврер, онда хич ким яшамаз. Ынсан-да, хайван-да ондан гачып гидер».

⁴ «Шол гүнлерде, шол дөвүрде ысрайыл ве яхуда халклары биле гелерлер, өзлериниң Худайы Ребби агтарып, аглай-аглай гелерлер. Муны Реб айдяндыр.

⁵ Олар йүзлерини Сиона тарап өврүп, оңа гидйән ёлы сорарлар. „Гелиң, унудылмаҗак эбеди әхт аркалы Реб билен бирлешелиң“ диерлер.

⁶ Мениң халкым йитен гоюндыр, олары чопанлары азашдырдылар, дагларда энтетдилер, олар дагдан дага чыкып, өз агылларыны унутдылар.

⁷ Ким тапса ийди олары. Душманлары дийдилер: „Биз языклы дәл, себәби олар хакыкат өрүси болан Реббе гаршы, аталарының умыды болан Реббе гаршы гүнә этдилер“.

⁸ Бабылдан гачып гутулың, бабыллыларың юрдундан чыкың, сүриниң өңүни чекйән эркеч кимин болуң.

⁹ Демиргазык юрдундан бейик миллетлер топлумыны Мен Бабылың гаршысына өрүзерин, олар оңа гаршы нызама дурарлар, шол ерде оны эле саларлар. Оклары мерген йигидиң окы кимин болар, хич бири бош гечмез.

¹⁰ Бабыллыларың юрды талаңа салнар, оны таланларың бары олҗадан дояр. Муны Реб айдяндыр.

¹¹ Эй, мирасымы талаян бабыллылар, сиз шатланярсыңыз, галкынярсыңыз, отлагдакы өкүзче дей бөкҗеклейәңиз, айгыр атлар кимин кишңейәрсиңиз.

¹² Эмма сизиң эне юрдуңыз утанҗа галар, гөбек ганыңыз даман ери аяк астына салнар. Ине, ол миллетлер ичинде иң әхмиетсизи болуп: чөллүге, гурак ере ве чола юрда өврүлер.

¹³ Ол Реббиң газабындан яңа илатсыз галып, бүтинлей харабалыга өврүлер. Бабылдан геченлер онуң яраларына хайран болуп сыкылык чаларлар.

¹⁴ Эй, кеманчылар, Бабылың даш-төверегинде нызама дуруң. Оңа ок атың, окы гайгырмаң, чүнки ол Реббе гаршы гүнә этди.

¹⁵ Төверек-дашдан оңа гыгырышың, ол боюн эгди; онуң минаралары йыкылды, диварлары ер билен егсан болды. Бу Реббиң өҗүдир, ондан өч алың. Өзи нәме эден болса, оңа хем шоны эдиң.

¹⁶ Экин экени, орак дөври оракчыны Бабылдан ёк эдиң. Залым гылыҗың зарбындан гачып, хер ким өз халкына тарап өврүлсин, хер ким өз юрдуна гачсын.

¹⁷ Ысрайыл арсланлар ковалап даргадан гоюн сүрүсине меңзейәр. Оны илки Ашур патышасы ювутды, Бабыл патышасы Небукаднесар соңра онуң сүңклерини гемирди».

¹⁸ Мунуң үчин Ысрайыл Худайы Хөкмүрован Реб шейле диййәр: «Мен Ашур патышасыны җезаландырышым ялы, Бабыл патышасы билен онуң юрдуны-да шейле җезаландырарын.

¹⁹ Ысрайылы ене өз өрүсине гетирерин, ол Кармелде, Башанда отлап, Эфрайым дагындакы Гилгатда герк-гәбе дояр.

²⁰ Мен аман галдыранларымы багышларын. Шол гүнлерде, шол дөвүрде Ысрайылың языгы агтарылар, йөне онуң хич бир языгы болмаз, Яхуданың гүнәлери агтарылар, йөне ондан хич зат тапылмаз. Муны Реб айдяндыр.

²¹ Мератайым юрдуна ве Пекот халкына хүҗүм эт. Олары өлдүр, аман галанлары бүтинлей ёк эт, өзүңе буйрушым ялы эт. Муны Реб айдяндыр.

²² Юртда уруш галмагалы, улы вейранчылык бар!

²³ Бабыл миллетлер арасында нәхили вейран болды! Бүтин дүнйәни токмаклан нәхили дөвлүп парчаланды!

²⁴ Мен саңа дузак гурдум, эй, Бабыл юрды, сен билмән оңа дүшдүң. Реббе гаршы чыкандыгың үчин, сен тапылдың хем тутулдың.

²⁵ Гудратыгүйчли-Хөкмүрован Реб бабыллыларың юрдунда этмели ишиниң бардыгы үчин, Реб горханасыны ачып, газап билен ярагларыны чыкарды.

²⁶ Бабыла хер тарапдан хүҗүм эдиң, онуң аммарларыны ачып, оны галла үйшмеклери кимин үйшүриң, оны бүтинлей ёк эдиң; ондан хич зат галмасын.

²⁷ Өкүзлериниң әхлисини өлдүриң, олар союлмага әкидилсин. Вай оларың халына! Чүнки оларың гүни долды, җеза пурсады гелди.

²⁸ Бабылдан гачып гутуланлар Худайымыз Реббиң өҗүни, Онуң ыбадатханасының өҗүни Сионда ыглан эдйәрлер, Оларың сеслерини эшидиң!

²⁹ Ок атянлары, кеманчыларың барыны Бабылың гаршысына чагырың! Онуң төверек-дашында дүшелге гуруң, хич ким ол ерден гачып гутулмасын. Эден ишине гөрә онуң алмытыны бериң, әхли эденлерини онуң өзүне эдиң. Ол Реббе, Ысрайыл Мукаддесине гаршы күпүрлик этди.

³⁰ Мунуң үчин онуң яш йигитлери мейданчаларда хеләк болар, әхли уршуҗылары ол гүн дымдырылар. Муны Реб айдяндыр.

³¹ Эй, текепбир, Мен саңа гаршыдырын, муны Гудратыгүйчли-Хөкмүрован Реб айдяндыр. Чүнки сениң гүнүң долды, сени җезаландырҗак вагтым гелип етди.

³² Текепбир бүдрәп йыкылар, оны хич ким галдырмаз. Мен онуң шәхерлерини ода якарын, даш-төверегиндәки әхли зады от якып яндырар».

³³ Хөкмүрован Реб шейле диййәр: «Ысрайыл билен яхуда халкы-да эҗир чекйәр, есир аланларың бары олары берк саклаяр, азат этмекден боюн гачыряр.

³⁴ Эмма Ысрайылың Пенакәри гүйчлүдир, Онуң ады Хөкмүрован Ребдир. Ол Ысрайылың ишини дерңәп, юрда рахатлык берер, эмма Бабылың илатына биынҗалык берер».

³⁵ «Бабыллылара гаршы гылыч инсин! Бабыл илатына, ёлбашчыларыдыр акылдарларына гаршы гылыч инсин! Муны Реб айдяндыр.

³⁶ Галп пыгамберлериң депесинден гылыч инсин! Олар акмак боларлар. Уршуҗыларының депесинден гылыч инсин! Олар тапдан дүшерлер.

³⁷ Атларының, сөвеш арабаларының депесинден, араларындакы әхли кесеки эсгерлериң үстүнден гылыч инсин! Олар хелей ялы боларлар. Хазыналарына гаршы гылыч инсин! Олар талаңа салнарлар.

³⁸ Бабыл бутлар юрдудыр, горкунч бутлар олары дәлиредер. Гой, онуң сувлары гурасын, олар такырап галсын!

³⁹ Мунуң үчин ол ерде вагшы хайванлар, шагаллардыр дүегушлар месген тутарлар. Мундан бейләк онда ынсан яшамаз, несиллер бойы хич ким аяк басмаз.

⁴⁰ Эдил Содомың, Гомораның, оларың гоңшуларының ер билен егсан болшы ялы, ол ерде-де еке адам галмаз, хич бир ынсан яшамаз». Муны Реб айдяндыр.

⁴¹ Реб шейле диййәр: «Ине, демиргазык юртдан бир халк гелйәр, ериң аңры уҗундан бир бейик миллет, көп патышалар аяга галяр.

⁴² Олар яйдыр найза билен ярагланан, өзлери хем рехимсиз хем залымдырлар. Олар атлара атланан, сеслери деңиз ялы гүвлейәр. Олар бир адам ялы сөвеше тайяр болуп, сениң гаршыңа нызама дурдулар, эй, Бабыл гызы!

⁴³ Бабыл патышасы олар хакдакы хабары эшиденде, эллериниң ысгыны гачды. Догурян аял кимин чекйәр дерт-азарлары.

⁴⁴ Мен-Реб арслан кимин Иордан җеңңелинден яп-яшыл өри мейдана чыкарын. Эдомлары дуйдансыз ол мейдандан чыкарарын. Өз сайланымы үстлеринден баштутан белләрин. Чүнки Маңа меңзеш ким бар? Менден хасабат сораҗак ким? Гаршыма чыкҗак чопан ким?

⁴⁵ Мунуң үчин Реббиң Бабыл хакдакы карарыны, бабыллыларың юрдуна ниетлән максадыны эшидиң: Хакыкатдан хем сүрүлериниң иң кичиси-де даргадылар, сүрүлери оларың кысматындан яңа довла дүшерлер.

⁴⁶ Бабыл эле салнанда болҗак галмагалдан ер йүзи сарсар; гыкылыкларының сеслери миллетлериң арасындан эшидилер».