Ýermeýa 49 - Мукаддес Китап

49-нҗы бап Аммонлар хакындакы пыгамберлик

¹ Реб аммонлар барада шейле диййәр: «Ысрайылың огуллары ёкмы? Онуң мирасдары ёкмы? Онда нәме үчин Милком Гады эеләп, халкы онуң шәхерлеринде яшаяр?»

² Реб шейле диййәр: «Аммонларың Раба шәхерине уруш награларыны эшитдирҗек гүнлерим гелер. Раба бир харабачылык үйшмеги болар, обалары ода якылар. Онсоң Ысрайыл өзүни эеләнлери эеләр. Муны Реб айдяндыр.

³ Ахы-нала чек, эй, Хешбон! Чүнки Ай галасы вейран болды! Эй, Рабаның обалары, перят эдиң, җул гушанып, яс тутуң, экин мейданларыңызда икияна ылгаң. Чүнки руханыларыдыр ёлбашчылары билен бирликде Милком сүргүн эдилер.

⁴ Эй, бивепа гыз, нечүн гүйҗүңе буйсаняң? Сениң гүйҗүң гачар. Сен хазыналарыңа буйсанып: „Мениң үстүме ким чозар?“ дийдиң.

⁵ Ине, даш-төверегиңдәкилериң барындан үстүңе ховп индерерин. Муны Гудратыгүйчли-Хөкмүрован Реб айдяндыр. Сиз даргадыларсыңыз, хер адам чем гелен ере гачар; гачанлары хич ким йыгнамаз.

⁶ Эмма мундан соңра Мен аммонларың өңки абаданчылыгыны гайтарып берерин. Муны Реб айдяндыр».

Эдом хакындакы пыгамберлик

⁷ Эдом хакда Хөкмүрован Реб шейле диййәр: «Тейман шәхеринде инди пайхас ёкмы? Даналарда маслахат галмадымы? Оларың акылдарлыгы күтелдими?

⁸ Эй, Деданың илаты, гачың, ызыңыза өврүлиң, букуларда гизлениң! Мен Ысавы җезаландыран вагтымда, онуң башындан бетбагтлык индерерин.

⁹ Эгер үзүмчилер багыңа гирсе, бирки салкым үзүм галдырмазлармы? Гиҗе өйүңе огрулар гирсе, өзлерине герегини огурламазлармы?

¹⁰ Эмма Ысавы чув ялаңач эдип, Мен эшигини сыпырарын, онуң гизлин ерини әшгәр эдерин, ол өзүни гизләп билмез. Онуң тохум-тиҗи, доган-гарындашлары, гоңшулары хеләк болар, өзи-де ёк болар.

¹¹ Етимлериңи ташла, олары дири сакларын. Дул хатынларың хем Маңа бил багласын».

¹² Реб шейле диййәр: «Җеза кәсесинден ичмәге лайык болмадыклар иченлеринден соң, хей-де, сен ичмән, җезасыз галармың? Ёк, җезасыз галмарсың, җеза кәсесинден хөкман ичерсиң.

¹³ Чүнки Өз барлыгымдан ант ичйәрин, Босра ховпа, масгарачылыга, харабачылыга, нәлете сезевар болар». Муны Реб айдяндыр.

¹⁴ Мен Ребден бир хабар эшитдим, миллетлер арасына чапар ёлланды: «Эдома чозмак үчин топланың, сөвеше аяга галың».

¹⁵ «Мен сени миллетлер арасында кичелдерин, ынсанлар арасында йигренҗе дучар эдерин.

¹⁶ Дүшен ховпуң ве текепбир йүрегиң сени алдава салды. Эй, гаяның җайрыгында яшаян, белент депелериң чүр башыны эелән! Сен хөвүртгәңи бүргүт кимин белент учутларда гурсаң-да, Мен сени ол ерден ашак дүшүрерин. Муны Реб айдяндыр.

¹⁷ Эдом ховпа өврүлер, ол ерден гечйән хер кес аңк-таңк болуп, онуң бетбагтлыкларына сыкылык чалар.

¹⁸ Эдил Содомың, Гомораның ве оларың гоңшуларының ер билен егсан болшы ялы, ол ерде еке адам галмаз, хич ынсан яшамаз. Муны Реб айдяндыр.

¹⁹ Мен арслан кимин Иордан җеңңелинден яп-яшыл өри мейдана чыкарын. Эдомлары дуйдансыз ол мейдандан чыкарарын. Өз сайланымы үстлеринден баштутан белләрин. Чүнки Маңа меңзеш ким бар? Менден хасабат сораҗак ким? Гаршыма чыкҗак чопан ким?

²⁰ Мунуң үчин Реббиң Эдом хакдакы карарыны, Тейман илатына ниетлән максадыны эшидиң: Хакыкатдан хем сүрүлериниң иң кичиси-де даргадылар, сүрүлери оларың кысматындан яңа довла дүшерлер.

²¹ Йыкылянлаң гүрпүлдисинден яңа ер йүзи сарсар, гыкылыкларының сеси Гызыл деңзе ченли эшидилер.

²² Ине, душман бүргүт кимин ёкары учар, ганатларыны Босраның үстүне яяр. Шол гүн Эдом уршуҗыларының йүреги догранда санҗы тутян аялың йүреги кимин болар».

Дамаск хакындакы пыгамберлик

²³ Дамаск хакында пыгамберлик: «Хамат ве Арпат утанды, эрбет хабары эшидип, горкудан титрешди, толкун атян деңиз кимин икияна алакҗап ырандылар.

²⁴ Дамаск меҗалсыз галды, гачҗак болуп өврүленде, оны горкы гаплады. Чага догурян аял кимин оны санҗы ве агыры тутды.

²⁵ „Вах, нечүн шатлыгымың меканы болан бу шөхратлы шәхер абат галмады?!“

²⁶ Мунуң үчин яш йигитлери мейданчаларда хеләк болар, онуң әхли уршуҗылары ол гүн дымдырылар. Муны Хөкмүрован Реб айдяндыр.

²⁷ Дамаск диварыны ода якарын, от Бенхададың галаларыны якып ёк эдер».

Кедар ве Хасор хакындакы пыгамберлик

²⁸ Бабыл патышасы Небукаднесарың басып алан Кедар ве Хасор патышалыклары хакында Реб шейле диййәр: «Туруң, Кедара хүҗүм эдиң, гүндогар халкыны ёк эдиң.

²⁹ Оларың чадырлары, сүрүлери эллеринден алнар, перделери, гап-гачлары ве дүелери таланар; халк: „Әхли тарапдан ховп абаняр!“ дийип гыгырар».

³⁰ «Эй, Хасорың илаты! Гачың, узаклара гидиң, букуларда гизлениң! Муны Реб айдяндыр. Чүнки Бабыл патышасы Небукаднесар сизиң гаршыңыза карар кабул этди, сизиң гаршыңыза дилдүвшүк гурады.

³¹ Туруң, асуда ве ховпсуз яшаян халкың үстүне хүҗүм эдиң. Муны Реб айдяндыр. Оларың не дервезелери, не-де килтлери бар, олар еке яшаярлар.

³² Оларың дүелери таланып, көп маллары олҗа алнар. Сач-сакгалларыны гыркан бу адамлары Мен чар тарапың ели билен даргадарын, хер яндан башларына бетбагтлык индерерин. Муны Реб айдяндыр.

³³ Хасор шагалларың сүренине ве эбеди харабачылыга өврүлер. Ол ерде-де еке адам галмаз, хич бир ынсан яшамаз».

Эйлам хакындакы пыгамберлик

³⁴ Яхуда патышасы Сидкияның шалыгының башларында Эйлам хакында Ермея пыгамбере Реббиң шу сөзи аян болды:

³⁵ «Хөкмүрован Реб шейле диййәр: „Мен Эйламың кувватының гөзбашы болан яйы дөверин.

³⁶ Асманың дөрт уҗундан дөрт ели Эйламың башындан индерип, олары бу еллериң чар тарапына даргадарын. Эйламың сүргүн эдиленлериниң аяк басмадык юрды галмаз.

³⁷ Мен Эйламы душманларының, җанының кастына чыканларың өңүнде горка саларын. Ловлаян газабым билен башларындан бетбагтлык индерерин. Муны Реб айдяндыр. Олары бүтинлей ёк эдйәнчәм, ызларындан гылыч саларын.

³⁸ Мен тагтымы Эйламда бина эдип, онуң патышаларыны ве ёлбашчыларыны ол ерден ёк эдерин. Муны Реб айдяндыр.

³⁹ Йөне ахыркы гүнлерде Эйламың өңки абаданчылыгыны гайтарып берерин. Муны Реб айдяндыр“».