Ýermeýa 47 - Мукаддес Китап

47‑нҗи бап Пилиштлилер хакындакы пыгамберлик

¹ Фараоның Газаны еңмезинден өң, пилиштлилер хакында Ермея Реббиң шу сөзи аян болды:

² «Реб шейле диййәр: „Демиргазыкдан сувлар җошуп, деря кимин долуп-дашар-да, юрды ве ондакы әхли затлары, шәхери хем яшайҗыларыны басар. Адамлар дады-перят эдерлер, юрдуң бүтин халкы ахы-нала чекер.

³ Даяв атларың тойнак сесинден, сөвеш арабаларының такырдысындан, тигирлериниң сеслеринден яңа эллери тапдан дүшен аталар өврүлип, чагаларына ярдам бермезлер.

⁴ Чүнки әхли пилиштлилериң ёк эдилҗек гүни гелер. Сура билен Сидона көмек эдип билҗек аман галанларың әхлиси ёк эдилер. Реб Капторың кенарында аман галан пилиштлилери дерби-дагын эдер.

⁵ Газа сачыны ёлар, Ашкелон сус болар. Эй, барҗа аман галанлар, хачана ченли өзүңизи яралаҗак?

⁶ Эй, Реббиң гылыҗы! Сен хачана ченли көшешҗек дәл? Гыныңа гир, ынҗал-да, асуда бол.

⁷ Реб оңа табшырык беренсоң, ол нәдип көшешсин? Ол оны ол ере – Ашкелона, деңиз кенарына гаршы ёллады“».