Ýermeýa 46 - Мукаддес Китап

46-нҗы бап Мүсүр хакындакы пыгамберлик

¹ Миллетлер хакында Ермея пыгамбере Реббиң сөзи аян болды.

² Бу Мүсүр хакдадыр. Яхуда патышасы Ёшыяның оглы Ехоякымың шалыгының дөрдүнҗи йылында, Бабыл патышасы Небукаднесарың Евфрат дерясының якасындакы Каркемишде Мүсүр патышасы фараон Неконың гошуныны дерби-дагын этҗекдиги хакындакы хабардыр:

³ Улы хем кичи галканлары тайярлап, сөвеше гириң!

⁴ Атлары эерләп, мүнүң, эй, атлылар! Тувулгаңызы гейип, орнуңызда дуруң, найзалары йителдиң ве совутлар гейиң.

⁵ Мен нәме гөрйәрин? Олар горкуп, ыза чекилдилер. Батырлары ере чалнып, ызларына гараман гачдылар. Әхли тарапдан ховп абаняр. Муны Реб айдяндыр.

⁶ Йүврүк гачып гутулмаз, батыр халас болуп билмез; демиргазыкда, Евфрадың кенарында олар бүдрәп йыкыларлар.

⁷ Ол нәмедир Нил кимин дашып, сувлар кимин чайканян?

⁸ Ол Мүсүрдир, Нил дей җошуп, сувлар кимин чайканян. Ол дийди: «Мен бейгелип, ер йүзүни гапларын, шәхерлери илаты билен бирликде ёк эдерин».

⁹ Эй, атлар, ел болуп учуң! Эй, сөвеш арабалар, дәлирәп чапың! Эй, батырлар, галканлы Эфиопия ве Пут, эй, эли яйлы лутлар, орта сөвеше чыкың!

¹⁰ Бу гүн Гудратыгүйчли-Хөкмүрован Реббиң гүнүдир; бу гүн ягыларындан ар алынян өч гүнүдир; гылыч олары ийип дояр, ганларыны ичип серхош болар; чүнки демиргазык юрдунда, Евфрадың кенарында Хөкмүрован Таңры Реббе гурбанлык берилйәр.

¹¹ Эй, бичәре Мүсүр халкы, Гилгада гит-де, мелхем ал! Дерманы көп ичмегиң пучдур; сениң дердиңе шыпа ёкдур.

¹² Сениң утанҗыңы миллетлер эшитдилер, ер йүзүне долды дады-перядың. Ики уршуҗы бири-бирине бүдрәп, икиси-де бирликде ере язылды.

¹³ Бабыл патышасы Небукаднесарың урушмак үчин Мүсүр юрдуна гелҗекдиги барада Ермея пыгамбере Реббиң шу сөзи аян болды:

¹⁴ «Мүсүрде ыглан эдиң, Мигдолда эшитдириң, Мемфисде ве Тахпанхесде эшитдирип, шейле дийиң: „Тайяр болуң, орнуңызда дуруң, гылыч дашыңдакылары гырып гутаряр“.

¹⁵ Нәме үчин өкүз худайың – Апыс гачды? Ол нәме үчин дуруп билмеди? Чүнки оны Реб ер билен егсан этди.

¹⁶ Көп эсгерлер бүдреди, бири-бириниң үстүне йыкылып: „Туруң, залым гылычдан гачып, өз халкымыза, догдук меканымыза доланалың“ дийдилер.

¹⁷ Ол ерде: „Мүсүр патышасы фараон бир яңра, ол пурсады элден сыпдырды“ дийип гыгырың.

¹⁸ Ады Хөкмүрован Реб болан Патыша шейле диййәр: „Өз барлыгымдан ант ичйәрин: бири гелер – ол даглар ичинде бейик Табор дагы киминдир, деңиз якасындакы Кармел дагы дейдир.

¹⁹ Эй, Мүсүриң илаты, гошуңы дүв, сүргүн эдилерсиң! Мемфис вейран болар, илатсыз бир хараба дөнер.

²⁰ Мүсүр бир энайыҗа гөле болса-да, демиргазыкдан оңа гөгейин чозар.

²¹ Хакына тутулан эсгерлери бага бакылан өкүз кимин болса-да, олар-да ыза дөнүп, билеликде гачдылар. Өз орунларында дуруп билмедилер. Чүнки башларына хеләкчилик гүнлери, җезаландырылҗак гүнлери етип гелди.

²² Душман гошуны билен хүҗүм эденде, ол сүйренип гачян йылан ялы хашшылдар. Душман агач чапян дей Мүсүре гаршы эли палталы чозар.

²³ Гүр болса-да, токайыны чапарлар, муны Реб айдяндыр. Олар чекиртгелерден-де көпдүр, хасабы ёк, сан-саҗаксыздыр.

²⁴ Мүсүр гызлары уяда галар, демиргазык халкының элине берлер“.

²⁵ Ысрайыл Худайы Хөкмүрован Реб шейле диййәр: „Мен Тебес шәхериниң худайы Амоны, фараоны, Мүсүри, онуң худайларыны, патышаларыны җезаландырарын. Фараона бил багланлары

²⁶ оларың җанларының кастына чыкан Бабыл патышасы Небукаднесар билен онуң серкерделериниң элине табшырарын. Шондан соң Мүсүр гадымкысы ялы ене илатлы болар. Муны Реб айдяндыр“.

²⁷ Горкма, эй, гулум Якуп, ховатырланма, эй, Ысрайыл! Чүнки Мен сени узак ерлерден, неслиңи сүргүн эдилен юрдундан гутарарын. Якуп ызына доланып, дынч хем асуда болар, инди оны хич ким горкузмаз.

²⁸ Горкма, эй, гулум Якуп, чүнки Мен сениң билендирин. Сени араларына даргадан миллетлеримиң барыны ёк этсем-де, сениң соңуңа чыкмарын. Эмма саңа адалатлы темми берерин, сени җезасыз галдырмарын. Муны Реб айдяндыр».