Ýermeýa 42 - Мукаддес Китап

42‑нҗи бап Халк Ермеядан Реббиң ислегини билип бермегини сораяр

¹ Онсоң гошун серкерделери, Кареяның оглы Ёханан, Хошаяның оглы Езаня ве улудан-кичә әхли халк голая гелип,

² Ермея пыгамбере шейле дийдилер: «Хайышымызы берҗай этмегиңи товакга эдйәрис, бизиң үчин, бу аман галанлар үчин Худайың Реббе дилег эт. Өз гөзүң билен гөршүң ялы, биз көпчүликдик, инди болса азалып галдык.

³ Нирә гитмелидигимизи, нәме иш этмелидигимизи, гой, Худайың Реб бизе гөркезсин».

⁴ Ермея пыгамбер олара: «Боляр, ине, айдышыңыз ялы, мен Худайыңыз Реббе дилег эдерин ве Реб нәме җогап берсе, оны сизе аян эдерин. Сизден хич зады яшырмарын» дийди.

⁵ Олар Ермея ене шейле дийдилер: «Эгер Худайың Реббиң бизе билдирмек үчин саңа аян эден хер бир сөзүни ерине етирмесек, гой, Реббиң Өзи бизе гаршы хакыкы ве вепалы шаят болсун.

⁶ Ягшы болса-да, яман болса-да, сени янына иберйән Худайымыз Реббе гулак асарыс. Ишимиз оңуна болар ялы, биз Худайымыз Реббе гулак асарыс».

⁷ Он гүнден соң, Ермея Реббиң сөзи аян болды.

⁸ Онсоң ол Кареяның оглы Ёхананы, онуң билен бирликде гошун серкерделерини ве улудан-кичә тутуш халкы чагырды.

⁹ Олара шейле дийди: «Дилегиңизи мәлим этмегим үчин мени Ысрайыл Худайы Реббиң хузурына ибердиңиз. Ол хем шейле диййәр:

¹⁰ „Эгер сиз шу юртда галсаңыз, Мен сизи гурарын, йыкмарын; бина эдерин, согруп ташламарын. Чүнки Мен сизиң башыңыздан индерен бетбагтчылыгыма өкүнйәрин.

¹¹ Бабыл патышасындан горкмаң. Сиз ондан горкярдыңыз, эмма инди ондан горкмаң. Муны Реб айдяндыр. Чүнки сизи халас этмек ве онуң элинден гутармак үчин Мен сизиң билендирин.

¹² Мен онуң сизе рехими инер ялы эдерин, шонда онуң сизе хайпы гелип, сизи өз юрдуңыза иберер“.

¹³ Эмма сиз: „Биз бу юртда яшаҗак дәл“ дийсеңиз ве Худайыңыз Реббе гулак асман,

¹⁴ „Ёк, биз Мүсүр юрдуна гитҗек, ол ерде уруш гарасыны гөрмерис, сурнай сесини эшитмерис, чөрексиз ачлык чекмерис, биз ол ерде яшарыс“ дийсеңиз,

¹⁵ Реббиң сөзүни диңләң, эй, Яхуданың аман галанлары! Ысрайыл Худайы Хөкмүрован Реб шейле диййәр: „Эгер сиз Мүсүре гидип, ол ерде орнашмагы карар этсеңиз,

¹⁶ горкян гылыҗыңыз ол ерде ызыңыздан етер, горкян ачлыгыңыз Мүсүрде сизиң якаңыздан япышар ве сиз ол ерде өлерсиңиз.

¹⁷ Орнашмак үчин Мүсүре гитмеги карар эден хер кес гылычдан, ачлыкдан ве мергиден өлер. Башларындан индерҗек бетбагтлыгымдан хич ким дири галмаз ве хич ким гачып гутулмаз“.

¹⁸ Ысрайыл Худайы Хөкмүрован Реб шейле диййәр: „Иерусалим халкының үстүне гахар-газабымы дөкүшим ялы, Мүсүре гитсеңиз, сизиң үстүңизе-де гахарымы дөкерин. Сиз нәлете, ховпа, утанҗа ве гаргыша сезевар боларсыңыз. Бу ере гайдып гелмерсиңиз“.

¹⁹ Эй, Яхуданың аман галанлары, Реб сизе: „Мүсүре гитмәң“ дийип буюрды. Билип гоюң, бу гүн муны сизе дуйдурандырын.

²⁰ Мени Худайыңыз Реббиң янына иберип: „Бизиң үчин Худайымыз Реббе дилег эт; Худайымыз Реббиң айдан әхли затларыны бизе билдир, биз-де ерине етирерис“ диениңизде, сиз улы хата гойбердиңиз.

²¹ Мен оны сизе бу гүн хабар бердим, эмма Худайыңыз Реббиң мениң үстүм билен сизе айдан сөзлериниң хич бирине гулак асмадыңыз.

²² Инди болса билип гоюң, гидип, яшаҗак болян ериңизде сиз гылычдан, ачлыкдан ве мергиден өлерсиңиз».