Ýermeýa 37 - Мукаддес Китап

37‑нҗи бап Ермея билен Сидкия патыша

¹ Бабыл патышасы Небукаднесар Ёшыяның оглы Сидкияны Ехоякымың оглы Ехоякының орнуна Яхуда юрдуна патыша эдип белледи.

² Эмма не онуң өзи, не хызматкәрлери, не-де юрдуң халкы Реббиң Ермея пыгамбериң үсти билен айдан сөзлерине гулак асдылар.

³ Сидкия патыша Шелемяның оглы Ехукалыны ве Магасеяның оглы Сепаня руханыны шейле хабар билен Ермея пыгамбериң янына иберди: «Бизиң үчин Худайымыз Реббе ялбарсана!»

⁴ Ермея хениз туссаг эдилмәнди, ол халкың арасына аркайын чыкярды.

⁵ Шол арада фараоның гошуны Мүсүрден чыкыпды. Иерусалимиң дашыны габан бабыллылар олар хакдакы хабары эшидип, Иерусалимден чекилипдилер.

⁶ Шонда Ермея пыгамбере Реббиң шу сөзи аян болды:

⁷ «Менден медет сорамак үчин сизи Мениң яныма иберен Яхуда патышасына Ысрайыл Худайы Реб шейле диййәр дийиң: „Ине, сизе ярдам бермек үчин, Мүсүрден чыкан фараоның гошуны өз юрдуна Мүсүре доланар.

⁸ Бабыллылар болса ене гелип, бу шәхере чозарлар ве оны эеләп якарлар“.

⁹ Реб шейле диййәр: „‘Бабыллылар хөкман үстүмизден айрылып гидер’ дийип, өзүңизи алдамаң; олар гитмезлер!

¹⁰ Өзүңизе гаршы сөвешйән бабыллыларың тутуш гошуныны дерби-дагын этсеңиз-де, араларында диңе яралы адамлар галса-да, олар ене өз чадырларында аяга галып, бу шәхери якарлар“».

Ермея туссаг эдилйәр

¹¹ Фараоның гошуны зерарлы бабыллыларың гошуны Иерусалимден ыза чекиленде,

¹² Ермея бенямин топрагына барып, халкың арасында өз пайына дүшен мүлкүни алмак үчин Иерусалимден гитмек иследи.

¹³ Ол Бенямин дервезесине етенде, Хананяның агтыгы, Шелемяның оглы Йирияй атлы баш гөзегчи Ермея пыгамбере: «Сен бабыллыларың тарапына гечҗек болярсың» дийип, оны туссаг этди.

¹⁴ Ермея болса: «Ялан! Мен бабыллыларың тарапына гечҗек боламок» дийди. Йөне Йирияй оңа гулак асмады ве Ермеяны туссаг эдип, ёлбашчыларың янына гетирди.

¹⁵ Ермея гахарлары гелен ёлбашчылар, оны енҗип, туссагхана ташладылар. Бу зындан өң Ёнатан кәтибиң өйүди.

¹⁶ Ермеяны зындандакы чукура габадылар, ол энчеме гүнләп, ол ерде галды.

¹⁷ Онсоң Сидкия патыша адам ёллап, Ермеяны өз көшгүне гетиртди. Патыша гизлинликде ондан: «Ребден, хей, сөз бармы?» дийип сорады. Ермея-да: «Хава, бар. Сен Бабыл патышасының элине табшырыларсың» дийди.

¹⁸ Ермея ене-де Сидкия патыша шейле дийди: «Мени туссагхана салар ялы, мен саңа, хызматкәрлериңдир бу халка гаршы нәме гүнә этдим?

¹⁹ „Бабыл патышасы сизиң үстүңизе, бу юрдуң үстүне чозмаз“ дийип, сизе велилик эден пыгамберлериңиз ханы ниреде?

²⁰ Инди маңа гулак гой, эй, җенабым патыша! Бу хайышымы берҗай этмегиңи товакга эдйәрин, мени гайдып Ёнатан кәтибиң өйүне иберме, ол ерде өлмәйин».

²¹ Онсоң Сидкия патыша Ермеяны гаравулханада габап сакламакларыны буюрды. Шәхерде чөрек бүтинлей гутарянча, хер гүн оңа чөрекчилериң көчесинден бир чөрек гетирип бермеклерини буюрды. Шейдип, Ермея гаравулханада галды.