Ýermeýa 33 - Мукаддес Китап

33‑нҗи бап Реб юрдуң өңки абаданчылыгыны дикелдер

¹ Ермея гаравулханада хенизем туссаглыкда сакланярка, оңа икинҗи гезек Реббиң шу сөзи аян болды:

² «Ери ярадан, оңа шекил берип, беркарар эден, ады Реб Болан шейле диййәр:

³ „Мени чагыр, саңа җогап берейин, сениң билмейән бейик хем пынхан затларыңың сырыны айдайын“.

⁴ Япгытлар билен чозуҗылардан горанмак үчин йыкылан бу шәхериң өйлеридир Яхуданың патышаларының көшклери хакында Ысрайыл Худайы Реб шейле диййәр:

⁵ „Эсгерлер бабыллылар билен сөвешмәге чыкарлар, эмма олар өйлери гахар-газабымда хеләк эден ынсанларымың җесетлеринден долдурарлар. Шол ынсанларың эден әхли эрбетликлери үчин, Мен бу шәхерден йүзүми гизледим.

⁶ Эмма Мен ол шәхере ене саглык ве шыпа берерин, олары сагалдарын, олара абаданчылык ве парахатлык эчилерин.

⁷ Мен Яхуданың ве Ысрайылың өңки абаданчылыгыны гайтарып берерин, олары өңкүси ялы эдип бина эдерин.

⁸ Олары Маңа гаршы эден әхли гүнәлеринден сапларын; Маңа гаршы эден әхли гүнәлерини, бар эден этмишлерини багышларын.

⁹ Дүнйәдәки хемме миллетлер олара этҗек әхли ягшылыкларымы эшидерлер. Бу шәхер оларың өңүнде Мениң үчин ат-абрай, шатлык, өвги хем шөхрат болар. Әхли миллетлер Иерусалимиң халкына эден ягшылыкларым ве эчилен парахатлыгым себәпли горкуп титрешерлер“.

¹⁰ Реб шейле диййәр: „Сиз бу шәхер вейран болуп, ынсансыз ве хайвансыз чөл болар дийдиңиз. Эмма илаты галман, ынсансыз ве хайвансыз чоларан Яхуда шәхерлеринде, Иерусалим көчелеринде ене-де

¹¹ шатлыкдыр гүлки сеси, өйленйән йигит билен гелниң той сеси, Реббиң өйүне шүкүр садакаларыны гетирип, шу айдымы айдянларың сеси яңланар: ‘Хөкмүрован Реббе алкыш болсун! Чүнки Реб ягшыдыр, садык сөйгүси бакыдыр!’ Мен юрдуң өңки абаданчылыгыны озалкысы ялы гайтарып берерин. Муны Реб айдяндыр“.

¹² Хөкмүрован Реб шейле диййәр: „Ынсансыз ве хайвансыз хараба болуп галан бу ерде, онуң әхли шәхерлеринде ене чопанларың өз сүрүлерини бакҗак яйлалары болар.

¹³ Даглык, гүнбатар байырлык, Негеп ве Бенямин галалары билен Иерусалимиң төверегиндәки ерлерде ве Яхуда галаларында чопанлар ене-де гоюн санарлар. Муны Реб айдяндыр“.

¹⁴ Реб шуны айдяндыр: „Мениң ысрайыл билен яхуда халкы хакында берен мерхеметли сөзүми ерине етирҗек гүнлерим гелер.

¹⁵ Шол гүнлерде, шол вагтда Мен Давудың неслинден бир догручыл Шаха чыкарарын. Ол юртда адалаты хем догручыллыгы берҗай эдер.

¹⁶ Шол гүнлерде Яхуда халас болар, Иерусалим ховпсуз яшар. Оны: ‘Реб – бизиң Хакперверимиздир!’ дийип атландырарлар“.

¹⁷ Чүнки Реб шейле диййәр: „Давудың несли Ысрайыл тагтында бакы отурар.

¹⁸ Мениң хузурымда якма гурбанлыкларыны, галла садакасыны, бейлеки гурбанлыклары бермекде леви руханылары хич вагт кемлик этмез“».

¹⁹ Ермея Реббиң шу сөзи аян болды:

²⁰ «Реб шейле диййәр: „Гүндиз билен гиҗе өз вагтында болмаз ялы, Мениң гиҗе-гүндиз барадакы әхтими бозуп билсеңиз,

²¹ онда тагтында патышалык этҗек оглы болмасын дийип, гулум Давут билен ве Маңа хызмат эден леви руханыларым билен эден әхтими-де бозуп болар.

²² Гулум Давудың неслини ве Маңа хызмат эдйән левилери сан-саҗаксыз асман җисимлери кимин, өлчәп болмаян деңзиң чәгеси кимин көпелдерин“».

²³ Ермея Реббиң шу сөзи аян болды:

²⁴ «Бу халкың: „Реб Өз сайлан ики тайпасыны-да рет этди“ дийип айдяныны гөреңокмы? Олар инди Мениң халкымы кемсидйәрлер, оны миллет хасап этмейәрлер.

²⁵ Реб шейле диййәр: „Гиҗе-гүндиз билен әхт баглашып, гөгүң ве ериң дүзгүнлерини Мен беркарар этдим.

²⁶ Хут шунуң ялы, Якубың несли билен гулум Давудың неслини-де рет этмедим. Ыбрайымың, Ысхагың ве Якубың неслиниң үстүнден Давудың огулларындан бирини хөкүмдарлык этмек үчин сайладым. Чүнки Мен оларың өңки абаданчылыгыны гайтарып берерин ве олара рехимдарлык эдерин“».